Rua endodanef i 3 ponc par l Fascia Balon che n domenia a venciù contra la Vigolana. Do aer rinvia la partida contra la Virtus Trent par la neveta che a fat domenia pasada i bec de pres Ghetta a jià a Vigolo Vattaro contra la Vigolana che aea i medemi ponc di fascegn. Ti prumes menuc part miec i joegn fascegn che do 5 menuc i fas n gol co na trata de cet de Samuele Ruggero che ven comedada te usc da Alessandro Crepaz ma l diretor de gara a anulà l gol par n fal dubie sul portier. do aer ciapa chest despiajer Deflorian e compagnes no se destramente e i seghita a spenjer par segnar n gol. Do n cart de ora rua n autra gtran ocajion par i fascegn co la trata da pec pas de Davide De Pellegrini che ven salvada su la linea de usc da n defensor de ciasa. Pasa i menuc e i parogn de ciasa proa a dar cruzies a la defendura fasciana che però ten dur. Envers la fin de l temp rua l ocajion par i valsuganoc con a trata da ite l area de rigor che ven parada da Simone Rasom de Rajum. Ti secondi carantacinch menuc par miec i parogn de ciasa e i joegn arcedè par chesta outa da Mister Gabrielli i cogn se defener. Entorn l mez del temp rua la più grana ocajion par la Vigolana co la trata da ite l area de rigor che ven parada dal joen portier fascian e su la rebatuda l atacant a brincà la crojada di pai. Col jir di menuc la endesfida la deventa tenicia de emozion. Son al 90’ somea che la partida se endreze a fenir 0 a 0 ma rua l gol de la venta fasciana con Massimo Lorenz de Meca che do aer ciapà l balon da Alessandro Rasom de Onz l sauta n om e l met l balon jun som al sach. Na venta padida ma meritada par i joegn fascegn che a desmostra de che “pasta” i e fac e i proaarà endodanef a portar a l ombria de sas da le doudes i 3 ponc ja n jebia tel recupero de la endesfida contra la Virtus Trent e n domenia al Cotura da mese le 3 contra l Alta Anaunia.
Tel fin de setemana i Arleeves a venciù par 7 a 0 contra l Borgo con 3 goi de Sami Said e n gol par om de Sebastian Cinzol, Thomas Liberatore, Michael Prinoth e Simone Zanoner, i giovanissimes a paerdù par 2 a 1 contra l Levico con gol de Nicolas Rasom, i esordienc “A” a perdù par 4 a 0 contra l Trent e i esordienc “B” a pareja par 3 a 3 contra l Fiem “B”.
Pierpaolo Rasom
Simone Rasom, Davide De Pellegrini(dal 31’st Gianni Riz), Alessandro Rasom, Matteo Bernard(dal 18’st Michele Petrone), Giovanni Deflorian, Giacomo Deflorian, Massimo Lorenz, Matteo Lorenz, Sebastiano Rasom, Alessandro Crepaz(dal 11’st Patrizio Deville), Samuele Ruggero(dal 46’st Michele Zulian). All. Matteo Gabrielli
VIGOLANA – FASSA 12 NOVEMBRE 2023
