Verla – Fascia 0 – 1
Lorenz, Bernard, Trottner, Deflorian Gio., Dellafior, Debertol, Porcu, Pezzei (30 s.t. Dallio), Amplatz, Cigolla (35’ s.t. Deflorian Giu.), Toma.
Zacan l’é ruà ence la venta! Dò n scomenz bon dal pont de veduda del jech e de la gaissa metuda te ciamp dai joegn del Fascia, ma dassen zomp da la man dei resultac che à vedù i ladins vadagnèr demò n pont te trei partides, l’un a nia arjont sul senester ciamp de Verla l’é desche ossìgen tant per se destachèr dai ultimes doi posć che per se arvejinèr a la squadres dedant.
Dò l 3 a 3 de la setemèna dant de contra a l’Ortigaralefre, enceben che mencèa i cater jiadores de maor esperienza desche Bernard, Cigolla, Debertol e Porcu, per la partida contra l Verla che vedea la formazion de Fascia endò al complet, l’era te duc la convinzion de portèr a cèsa i trei ponc.
Coscì la é stata ma se cogn dir che ence enstouta Debertol e comapgnes à fadìà più de chel che se cognessa a trèr l balon te usc. I prumes vintecinch menuc i ladins à schicià i cembrans te sie mezciamp coran n muie e proan più outes a dèr vèlch cruzie a l’ultim defensor de cèsa, ampò no troan de gran ocajions se no n par de trates da dalenc che no à fat mèl.
Fat el gran sforz te la pruma mesora, te l’utlim chèrt de ora i bec del president Ghetta à tirà l fià ge lascian te man l jech al Verla ma zenza mai risćèr nia.
Fenì che l’é stat l prum temp, te deregoladoi i ladins à pussà la giames ma no l cef che seghitèa a majenèr la medema idea, venjer. I secondi carantacinch de jech é scomenzé desche i prumes col Fascia che à sobito tout te man la rédenes de la endesfida palesan na neta soramessa te la defendura e a mezciamp. Ampò i atacanc seghitèa a fadièr a troèr l giust vèrech e coscì s’é resté sul resultat dai vegeres enscin a diesc menuc da la fin canche su na bela trata dal cianton de Dallio, Bernard à spent de cef l balon vindò la schena del portier cembran. Gol più che vadagnà chel dei fascègn che pech dant aea ence ciapà n remenat aut su na trata de cef de Trottner.
Te i ultimes menuc la formazion de cèsa à proà a trèr sù balons ma la vèrda dei ladins é stata semper auta e la miora ocajions les fossa ruèdes endò sui piesc di atacanc del Fascia che ampò mingol per la prescia mingol per la fadìa no concretisà de bogn contrataches. Belebon che enstouta à bastà n gol per la venta che segur dèsc moral ence per la endesfida che vegn, sul ciamp Cotura de Vich da les cater de contra l Telve.
Bogn resultac ence per la squadra mendres di Arleves che à vent 4a1 contra la VIPO Trento (2goi de Dennis Rasom e un per om de Patrick Cincelli e Giuseppe Demarinis) e di Giovanissimi che à parejà 2a2 contra l Piné (goi de Samuele Ruggiero e Alessandro Rasom). La doi squadres di Esordienc à alincontra perdù contra Valcembra e Bolgera.
Chesta sabeda i Arleves jia a Vich da les sie contra l Mezzocorona e i Esordienc A, a Pardac da les cater contra la Dolomitica. Domenia i Giovanissimi jia a Mattarello da mesa les unesc e a la medema ora sa Vich i Esordienc B jia contra l Fiem.