Rua n autra venta par l Fascia balon che l bat par 2 a 1 l Valsugana. Ti prumes menuc Trottner e compagnes fas faida a meter dant l bel jech ajache l ciamp de Scurelle no deida le squadre che jia col balon ras al teren e i parogn de ciasa i das più cruzies a la defendura fasciana che però e bona a valch vida de no ciapar l gol. Col jir di menuc i bec de Mister Cigolla i ciapa le mesure e i cer de auzar la squadra e proar a dar cruzies a i parogn de ciasa con la velocita de i sie attacanti ma zenza crear ocajions degne de nota se no con trate da cet che le jite fora de pech. Ti ultimes menuc de l prum temp rua la più grana ocajion par i joegn fascegn con Massimo Lorenz che ciapa l balon l sauta n par de aversaries e da tanche fora area l proa la trata che ciapa l remenat a la dreta del portier. Te la seconda part de la endesfida i bec de pres. Ghetta i taca miec e i das cruzies a i valsuganoc che però i e bogn de no ciapar l gol. Sul mez dal temp rua l ocajion che sbloca la partida, Patrizio Deville proa la trata da i 20 metres parada dal portier, su la rebatuda l medemo Deville tol l balon e l defensor i lo fas rebaltar via par jabas e l arbitro das rigor che Sebastiano Rasom l met jun som al sach. Passa i menuce i fascegn fas n auter gol con Fabio Bernard che, pech do che le jit ite, l ciapa n balon al limite dal l area de rigor, l tira e l segna. Ti ultimes menuc i parogn de ciasa i proa a scutar l resultat e i e bogn co na bela trata da cet che Colusso no le bon de ciapar. Fensc coscita la endesfida che dal la “matematica” salveza par i fascegn che però no i cogn sbasar la concentrazion. N domenia i jiarà contra la pruma da la clas, l Porfido Albiano, da le 4.
Tel fin de setemana à jia le squadre mendre, la juniores a perdù par 4 a 1 contra l Civezzan con Gol de Enrico Bernard, i Arleeves a venciù contra l Ortigaralefre par 1 a 0 con gol da Mattia Roldo, i esordienc “A” a pedù par 2 a 1 contra l Perjen, i esordienc “B” a venciù par 3 a 0 contra la Dolomitica “A”, i ponjins “A” a venciù contra i ponjins “B” par 3 a 0 e i ponjins “C” a venciù par 2 a 1 contra l Fiem “C”.
Pierpaolo Rasom
Alessandro Colusso, Alessandro Rasom(dal 25’pt Tommaso Gloder), Gianni Riz(dal 25’st Patrick Cincelli), Matteo Lorenz(dal 40’st Gregor Löwe), Giovanni Deflorian, Luca Trottner, Massimo Lorenz, Michele Petrone(dal 15’st Gabriele Riz), Sebastiano Rasom, Samuele Ruggero, Patrizio Deville(dal 30’st Fabio Bernard). All. Luciano Cigolla
VALSUGANA – FASSA 1 MAGGIO 2022
