Col ruèr de la neif e del freit, se à serà sù ence l campionat de balon de Pruma Categoria che veit l Fascia se la jièr te la ultima posizions de la clasifica. Te l’ultima partida jièda ai 3 de dezember, Debertol e compagnes à perdù 2 a 0 contra l Spormaggiore, jian ampò na bela endesfida che seguramenter aessa podù fenir a na vida desvaliva se no fossa stat per mingol de malasort che à portà i ladins a la metà del prum temp a se fèr ite enstesc l gol del svantac. Chest à dapò condizionà l’éjit de duta la partida coi parons de cèsa seré tedò e vertesc a pontèr via en contratach. Su un de chisc l’é ruà ence l secondo gol al scomenz del secondo temp, dò che l Fascia aea falà n par de bona ocajions. Aboncont perder su chest ciamp, semper n muie senester, e contra la terza en clasifica, ge stèsc e fèsc manco mèl de autra desfates sopides te chesta pruma pèrt de campionat. De fat, i ponc perdui dò strèda contra Piné, Alta Anaunia, Verla e TNT Monte Peller, peisa de segur n muie de più ajache lascé a squadres del medemo livel e che con pech de più se les podessa aer vindò en clasifica. Se zeche de miec se cognarà vardèr de fèr l’aisciuda che vegn, jirà fat proprie de contra a chisc aversaries. Ence se la desfates les é states dassen massa, no l’é mencià i aspec positives te chesta pruma pèrt de sajon da alenador de mister Chelodi. Chel che maormenter se à palesà, l’é l gran lurier fat coi joegn e la fiduzia che a chisc ge à dat enceben cognan jièr te condizions nia sorides. Apede a Matteo Lorenz che jà l’an passà aea dat a veder de esser vertech per la pruma squadra, l “Ciulu” à petà te ciamp beleche semper e zenza se pesimèr trop, etres trei cater joegn del doimile: Sebastiano Rasom, Patrick Cincelli, Gabriele Riz, Pierpaolo Rasom. Autra bona notes l’é stat ence la gestion dei doi portieres Lorenz e Colusso che à jià mingol per om, la conferma de la cobia de defensores Trottner-Deflorian e l recuperament de joegn desche Gianni Riz e Federco Cincelli che aea lascià alò de jièr.
Donca, enceben che i resultac no sie semper stac bogn e che i ponc vadagné no i é n muie, peisse de poder dir che se pel vardèr al davegnir con otimism ajache la squadra la é jona, piena de gaissa e ence de calità.
Col didament e l’ejempie che enscin ades i “veies” Bernard, Cigolla, Debertol e Deluca, no à mai fat mencèr, chesta formazion no pel fèr auter che crescer, jà a partir da la seconda pèrt de chest campionat che pontarà demez l’ultima domenia de firé. Ma ades l’é de giusta ence se pussèr e se fèr doi strojèdes coi schi.
Da man del Fascia Balon, a duc i sostegnidores e i amisc, n bel augurie de bona festes.