Solteri – Fascia 1 a 1 (gol de Debertol)
Formazion del Fascia: Colusso Alessandro, Trottner Luca, Debertol Cristoforo, Deflorian Giovanni, Riz Gianni, Bernard Manuel, Lorenz Matteo (40’ s.t. Aleksi Julian), Rasom Sebastiano, Pezzei Michael, Lorenz Daniele (25’ s.t. Rasom Lorenzo), Cigolla Patrizio (30’ s.t. Toma Nicolas)
Belebon de spes canche la robes no les carenea desche se volessa, se se taca a la malasort ma, a ge pissèr delvers, se troa semper ence la vera caujes de che che no va.
Coscì l’é stat ence te la ultima partides del Fascia Balon, olache a chierir delvers se à troà che anter n eror del portier, un del defensor e un de l’atacant, fosc la sort, mala o bona che la fosse, se la podea meter da na man.
Enstouta ampò, canche dò na partida jièda delvers, olache se à ence padì ma se à tegnù bot, dò esser jic en vantac e aer proà a troèr ence l secondo gol, ciapèr l gol de la parità a l’ultim menut de recuperament del secondo temp e dir adaut “che desfortuné che sion” segur no l’é stat massa.
Ence perché la parità la é ruèda aldò de n autogol su na trata dal cianton che no la era. E se pisson che trei dis dant, te la partida de Copa Provinzia, semper en vantac de un a nia (trata dai unesc metrese de Debertol), a trèr te usc fascian la bala del un a un final l’era stat l defensor ladin Luca Trottner, alora tirèr cà la malasort fosc no l’é deldut falà.
Desche scrit, l Fascia aea troà l vantac, da nef co na trata dai unesc metres de Debertol, e per dut l prum temp à tegnù te man l jech. Tel secondo temp envers a tegnir vif l jech ge à pissà i parons de cèsa ampò dajan pech da lurèr a Colusso e lascian ai fascegn gran post per i contrataches. La soula ocajions per i trentins les é ruèdes su trates da cet, olache soraldut te na ocajion, l portier del Fascia é sgolà per trèr fora dal cianton aut la bala. Da l’autra man i ladins à abù dotrei oportunitèdes con Lorenz, Riz e soraldut con Cigolla che se à vedù rebater na gran trata dal portier ghest, sutà fora da l’usc a eies seré. E l’é su chesta ocajion mencèdes che i bec de mister Chelodi cogn se bater l prust, ajache ensotuta scì, te l’ultim menut la malasort ge à metù la man.
Dut ensema, l’un a un a Gardol contra chesta squadra, seguramenter la miora scontrèda enscin ades dal Fascia, l’é n pecià per coche l’é ruà ma no l’é na desfata. Da ades inant però no se pel perder etres ponc.
A scomenzèr da chesta domenia, a Vich da mesa les cater contra l Giovo.
Per chel che vèrda la squadra mendres, la Juniores à perdù 2 a 1 contra l’Oltrefersina e jiarà sabeda da les cinch a Albian, i Arleves à vent 6 a 2 contra la Dolasiana e jiarà domenia da mesa les unesc a Ravina, i Giovanissimi “A” à vent 2 a 1 contra l Valcembra e jiarà sabeda da mesa les sie a Vich contra la Vigolana, i Giovanissimi “B” à perdù 6 a 2 contra l Lavis e jiarà a Vich domenia da mesa les unesc contra l’Anaune.