Solandra – Fascia 1 a 1 (gol de Patrizio Cigolla)
Formazion del Fascia: Colusso Alessandro, Trottner Luca, Deflorian Giovanni, Debertol Cristoforo, Rasom Lorenzo (33’ s.t. Cincelli Federico), Bernard Manuel, Lorenz Matteo (40’ s.t. Rasom Dennis), Riz Gabriele, Pezzei Michael (30’ s.t Riz Gianni).
L’é stat demò n autogol a n chèrt de ora da la fin a blochèr l’arjonta del prum post en clasifica, da man de la formazion ladina che, dò aer smendrà l desvantac co la pruma, da sie a un pont te la pruma doi partides, aessa volù jà te chesta partida, ruèr a passèr via la pruma de la clas.
Tel prum temp, se à vedù doi squadres che volea venjer con azions da na man e da l’autra ma con gran imprezijion te i ultimes vint metres e l vent a dèr d’empaz coscì se à scomenzà la seconda pèrt de garejèda sul resultat dai vegeres. Ampò l vantac ladin no se à fat spetèr e l’é ruà de gra a Patrizio Cigolla, asvelt a trèr te usc na bala ben defenuda e comedèda da Gabriele Riz. Sul un a nia l Fascia à fat mingol de fadìa a se defener con orden sul ciamp de Dimaro, più lèrch de duc i etres ciampes te chesta categoria, e contra n aversarie zach e usà a jièr te chela mesures. Enceben la dificoltèdes i ladins no à però conzedù de gran ocajions tant che la trata dai unesc metres scìgolèda dal diretor de jech a pro de i parons de cèsa e parèda da Colusso, l’é stat la pruma trata te usc de chisc te dut l secondo temp, ajache nience l gol de la parità, a diesc menuc da la fin, l’é ruà da na trata te usc ma da n cross da la man dreta olache Lorenzo Rasom, falan l’intervent à trat malamenter l balon te usc fascian.
L’un a un à dat neva gaissa ai solandres e petà mingol jù de moral l Fascia ampò da lò a la fin no l’é stat più de gran ocajions e l resultat, dut somà se cogn dir che l’é giust.
Per troèr l cef de la clasifica se cognarà spetèr amò mingol ma l Fascia l’é segur su la bona strèda. Dut semper da confermèr, partida dò partida, a scomenzèr da chesta domenia, dò trei la pruma sul ciamp de Vich, contra la Cornacci che se cogn dir à scomenzà dassen delvers chest campionat d’aisciuda. Ve speton donca duc a sostegnir l Fascia, da les trei.
Per chelò che vèrda la squadra mendres, resultac desvalives. Ventes per Juniores (2a1) e Giovanissimi “A” (2a0), desfates per Arleves (3a1) e Giovanissimi “B” (7a0).
Chesta sabeda, la Juniores jia a Cembra da mesa les cater e i Giovanissimi “A” a Vich contra l Fiem da mesa les sie.
Domenia, a Vich, da mesa les undesc i Giovanissimi “B” jia contra l’Arco e da mesa la una i Arleves jia contra l’Ortigaralefre.