Na setemana dassen positiva par l Fascia Balon degrà a i 4 ponc madurè contra l Fiem e l Porfido Albian.
N mercol sera i bec de mister Capovilla taca sobito ben contra l Fiem e do cinch menuc rua l gol fascian con Alessandro Crepaz che desfruta n bel assist de Massimo Lorenz de Meca e te dant al portier no l bazila e l met l balon te sach. i ladins i e engaisse e i proa a far l secondo gol ma zenza esser bogn de dar gran cruzies a la defedura fiamacia. Sul mez dal temp rua una de le pecie ocajion par i ghesc co na trata da ite l area de rigor che fenesc sul remenat a cencia del portier fascian. Pasa 2 menuc e i fascegn pareja l cont dai i legnes con Gianni Riz Peta che co na trata da l l imite de l area de rigor che brinca l remenat aut. Ti secondi carantacinch menuc le i fiamaces che jia miec ma la pruma ocajion la e par i parogn de ciasa che par mingol de desfortuna e mingol de pecia mira no i e bogn de far gol. Entorn l cart de ora rua l gol fiamac co n schema da la trata dal cianton che sfrea la defendura fasciana. Col jir di menuc i ghesc riscia de far l gol de la venta co na trata de ciaf che no fenes te usc degrà na gran parada de Simone Rasom de Rajum.
N domenia i ladins i e jic n trasferta contra l Porfido Albian. Ti prumes menuc le Trottner e compagnes che part miec e do 5 menuc rua l prum gol fascian con Michele Petrone del Pat che da doi pas met te sach l balon degrà l bel assist de Massimo Lorenz. Col jir di menuc le i parogn de ciasa che ten l balon ma zenza esser pericolousc da le man de Simone Rasom. la pruma ocajion cembrana la rua entorn l mez dal temp co na trata da fora parada dal portier ladin. Tel secondo temp de la endesfida le i parogn de ciasa che se peta inant a troar l gol dal pareje e i bec fascegn che se defen dalvers e par n contropè. Do n art de ora rua l secondo gol fascian, Sebastiano Rasom de Gotart le bon de robar l balon al defensor de ciasa, l das l balon a Patrizio Deville de Bronza che met l balon te sach. Do aer fat l secondo gol i ladins se engaissa e pech do rua l terzo gol con Alessandro Crepaz, l clas 2003 da Rèba do aer ciapà l balon da Sebastiano Rasom l sauta n aversarie e rua te dant al portier l met l balon te sach. Passa i menuc e a 10 da la fin rua l gol del Albian co na sbalonada che rua a l atacant che bat Simone Rasom.
4 ponc che fas far n bel saut inant te calssifica ai bec de Pres. Trottner che proaarà a far seghitar la striscia positiva contra l Pinè da mese le 3 al Cotura n domenia.
Tel fin de setemana la seconda squadra a perdù par 3 a 1 contra l Alpe Cimbra con gol de Mattia Manenti, la juniores a perdù par 6 a 1 contra l Val di Cembra con gol de Gabriele Lorenz, i giovanissimes a venciù par 10 a 1 contra l Levico con 4 goi de Tommaso Chiocchetti, 3 de Thomas Rizzi, 2 de Alessio Detomas e un de Filippo Farina, i esordienc “A” a venciù par 3 a 1 contra l Civezzan, i ponjins “A” a venciù par 4 a 0 contra l Fiem “C” e i ponjins “C” a venciù par 4 a 3 contra l Fiem “D”.
Pierpaolo Rasom
Formazion contra l Fiem: Simone Rasom, Gianni Riz, Tommaso Gloder, Matteo Lorenz, Emiliano Cinzol, Luca Trottner, Massimo Lorenz (dal 10’st Michele Petrone), Roberto Del Negro(dal 28’st Gabriele Riz), Sebastiano Rasom(dal 10’st Erik Costa), Alessandro Crepaz(dal 18’st Matteo Bernard), Patrizio Deville(dal 35’st Davide De Pellegrini).
Formazion contra l Porfido Albian: Simone Rasom, Gianni Riz (dal 38’st Alexander Weiss), Tommaso Zulian(dal 10’st Emiliano Cinzol), Davide De Pellegrini, Matteo Bernard, Luca Trottner, Michele Petrone, Gabriele Riz(dal 17’st Sebastian Cassan), Sebastiano Rasom(dal 23’st Tommaso Gloder), Patrizio Deville, Massimo Lorenz(dal 10’st Alessandro Crepaz). All. Alessandro Capovilla
PORFIDO ALBIANO – FASSA – 18 OTTOBRE 2025
