Do la curta paussa da d’invern n domenia passada le ricomenzà l campionat de pruma categoria par l Fascia Balon che a jià contra l Perjen a Perjen. Ti prumes menuc a la miec l ciamp co nesuna da le coi squadre le bona de empervaler su l autra. Do n cart de ora, a la pruma ocajion de la partida, i parogn de ciasa passa co n balon metù te meza l area de rigor che l atacant a metù te sach da pec pas da l usc. Do aer ciapa gol Deflorian e compagnes i a tacà a spenjer par cerir l gol del pari e al mez de l temp l rua co na trata da i undes metres vadagnada da Massimo Lorenz de Meca e tramudada n gol da Sebastiano Rasom de Gotart. Pasa n pec de menuc e le i parogn de ciasa che podesa passar inant con a trata da i undesc metres ma l joegn portier fascian Simone Rasom de Rajum le bogn de parar la trata de l atacant valsuganot, pasa n menut e i valsuganoc pasa n do co n gol de la domenia. Te la seconda part de la endesfida i joegn fascegn jia miec e i proaa drezar la partida e do n cart de ora rua l gol del 2 a 2 con Gabriele Riz de Janoto che do na bela combinazion con Matteo Bernard de Bernardo l met l balon te do l portier de ciasa. Do l gol i bec de pres Ghetta se peta inant par far l gol de la venta con n par de trate che e fenide fora de pech. Ti ultimes menuc rua n ocajion per l Perjen ma la trata de ciaf no la fenesc te usc. N pont vadagnà da i ladins ajache i a cognù far i conc co la sajon e de fat i a cognù far a de manco de jiadores che da n vers despias, ma da l auter a fat far i prumes menuc a doi joegn l 2006 da Soraga Tommaso Zulian e l 2008 da Moena Sami Said. Setemana che ven i joegn fascegn proaarà a portar a ciasa i trei ponc contra l Tesino a Castel Tesino n domenia 25 da le 5.
Tel fin de setemana le taca ence l campionat Arleeves che a vedù venjer l Fascia contra l Fiem par 6 a 3 con 2 goi de Thomas Ngresi e un par om de Sebastian Cinzol, Michael Prinoth, Omar Defrencesco e Simone Zanoner.
Pierpaolo Rasom
Simone Rasom, Gianni Riz(dal 49’st Tommaso Zulian), Davide De Pellegrini, Matteo Lorenz(dal 25’st Sebastian Cassan), Giovanni Deflorian, Tommaso Gloder, Massimo Lorenz, Matteo Bernard(dal 38’st Lorenzo Riz), Sebastiano Rasom, Sami Said(dal 35’st Erik Costa), Gabriele Riz (dal 41’st Patrick Cincelli).All. Luciano Cigolla
PERGINE – FASSA 18 FEBBRAIO 2024
