Ozolo Maddalene – Fascia 1 – 3 (doi autogol e 1 gol de Gabriele Riz)
Formazion del Fascia: Colusso Alessandro, Rasom Pierpaolo (30’ s.t. Lorenzo Zanoni), Luca Trottner, Giovanni Deflorian, Cincelli Patrick (1’ s.t. Nicolas Toma), Matteo Lorenz, Debertol Cristoforo, Gianni Riz (40’ s.t. Gabriel Chiocchetti), Gabriele Riz (40’ s.t. Alessandro Lorenz), Patrizio Cigolla (35’ s.t. Sebastiano Rasom), Zanoner Dimitri.
Cognea esser venta, e venta l’é stat. Do la pruma doi partides zenza ponc enceben che la squadra fascèna aea jià al medemo livel dei aversaries endesfidé, servia per clasifica e moral, portèr a cèsa i trei ponc. L’ocajion l’era chela giusta ajache la formazion del Monte Ozolo l’é segur una de la manco fortes del campionat ampò l Fascia l’é ruà sul ciamp de Cloz zenza dotrei jiadores importanc desche Bernard, Deluca e Kola. Dal scomenz à donca cognù jièr n par de joegn che no aea mai jià dal prum menut co la squadra maora ma che no à zitrà e alincontra à dat n gran contribut per la venta finèla: Pierpaolo Rasom e Gabriele Riz. L prum à propizià co na bela trata dal cianton l gol del un a un, l secondo à fat ite l trei a un.
Anter chisc doi goi, a la fin del prum temp, l secondo autogol, ruà ence chest su na trata dal cianton, che à dat l vantac ai ladins giusta dant de la paussa. L Fascia aea palesà jà dal scomenz de esser la squadra miora sul ciamp ma vèlch distrazion de massa te la fasa de defendura, aea portà i parons de cèsa a troèr dotrei pericolousa ocajions e ence l vantac intorn al venteisem menut. Chest no à petà jù i joegn de Fascia che à spent semper de più e se cogn dir, ence con mingol de bonasort, à porta i aversaries a falèr e a troèr te diesc menuc la parità e l vantac.
L secondo temp, desvalivamenter dal prum, no à abù storia. I bec de mister Chelodi à tegnù l jech dal prum a l’ultim menut, zenza mai risćèr nia tedò e alincontra metan ensema n muie de bona ocajions. A serèr sù la endesfida se à però cognù spetèr la mesora dei secondi carantacinch de jech canche Zanoner à manà Gabriele Riz soul contra l portier. L joen de Ciampedel, che tel prum temp aea falà na ocajion beleche valiva, enstouta no fala. Met a sentèr l portier e peta te usc l balon del trei a un. Partida fenida e prumes trei ponc te Fascia.
Desche dit, l Monte Ozolo segur no l’é l’aversarie più rie che l Fascia scontrarà te chest campionat ampò ogne partida à la sia istoria e per venjer se cogn semper fèr zeche de miec de l’aversarie. Enstouta i ladins i lo à fat e i ge proarà endò ence chesta domenia, prum de otober, de contra al Verla sul ciamp de Vich da mesa les cater.
Per chel che vèrda la squadra mendres, Juniores e Giovanissimi à perdù doi a un col Calisio e col Telve. Vent col medemo resultat per i Esordienc.
Chest fin de setemèna, la Juniores jiarà contra l Fiem sabeda da mesa les set a Vich, i Arleves a Ischia contra l’Auta Valsugana domenia da mesa les unesc, i Giovanissimi contra l Trent a Trent sabeda da les sie, i Esordienc “A” sabeda a Vich da les cater contra la Rotaliana, i Esordienc “B” semper sabeda da les cater a Moena contra la Monti Pallidi.