Ortigaralefre – Fascia 1 – 0
Cincelli, Bernard, Debertol, Deflorian Gio., Dallio (15’ p.t. Deflorian Gia. – 15’ s.t. Lorenz A. – 35’ s.t. Deflorian Giu.), Dellafior, Pezzei, Petrone, Lorenz M., Toma, Azizi.
La pruma endesfida dalenc dal ciamp de cèsa no l’é stat de segur la miora che se se podea spetèr da la formazion ladina con n ejit negatif che va aldelà del resultat. Contra na formazion zis manco forta de la pruma does scontrèdes dal Fascia, l’é ruà la pruma desfata del campionat, n’azident a la cevila per Dallio e i doi cartelins śai e l ros per Debertol. Ma jon con orden.
Sul solit ciamp de Grigno, tant burt da no poder jièr delvers a balon, mister Bernardin se troa amò a cogner fèr condemanco de jiadores fondamentèi desche Cigolla, Porcu e Trottner. Aboncont ence se mingol repezé, l Fascia ponta via delvers tolan l jech te man e spenjan endò i parons de cèsa, ence se jà dò cinch menuc, n fal dassen burt su la cevila, met fora jech Dallio. Enceben che i valsuganoc no sparagna gran peèdes e l diretor de jech fèsc mena de nia, i fascegn no i se sprìgola e seghita a spenjer chierian l gol del vantac per dut l prum temp, ampò zenza resultac perché mencia l sbunf giust te i ultimes seidesc metres. Alincontra l’é i aversaries su n contratach a jir più davejin al gol ma Cincelli à fat bona vèrda.
Tel secondo temp la mùsega muda, l jech doenta dut na trata da na defendura in l’autra coi zenterciampisć che cor a vet no ruan a filtrèr l jech, e i atacanc fascegn che, più picui di defensores de cèsa, fèsc fadìa a tegnir sù l balon. La defendura fascèna vegn donca metuda mingol sot prescion e i valsuganoc troa dotrei bona ocajions per l vantac, ampò falèdes malamenter o blochèdes da Cincelli. Dò na gran ocajion ruèda ence sui piesc de Beppe Deflorian ma falèda no se sa co, la partida somea poder endò fenir zenza nia de fat enscin a cinch menuc da la fin canche n atacant de cèsa pèrt soul envers l’usc ladin. Podessa esser la giusta ocajion ampò l fala l control de la bala e l se emponta tel teren sutan jabas. I ladins tira l fià, no fossa auter che l diretor de jech peissa che l’atacant sie sutà jù aldò de n fal de Debertol. Scìgol e cartelin śal che sumà a chel ciapà mingol dant porta a l’espulscïon. Squadra de cèsa che profita sobito del vet lascià da l’espulscïon te la defendura e a partida oramai fenida troa l gol de la venta.
Na gran ira da man ladina per coche chesta desfata la é ruèda ence se bensegur l Fascia, per coche à jià la seconda pèrt de jech, no aessa merità de venjer. Ma chel che fosc fèsc più ira l’é che ence per la partida che vegn, no se poderà meter te ciamp na formazion al complet.
Ampò, contra l Verla, domenia da mesa les cater a Vich, l Fascia les proarà dutes per portèr a cèsa la pruma venta.
Chisc i resultac e la partides che vegn de la squadra mendres: i Arleves à vent 2a1 contra la VIPO Trent e jiarà domenia a Mezzocorona da mesa les unesc, i Giovanissimi à parejà a Piné 4a4 e jiarà sabeda a Mattarello da les sie, , i Esordienc “A” à perdù col Ischia 3a2 e jiarà sabeda a Vich contra l Valcembra da les cater, i Esordienc “B” à parejà 2a2 e jiarà sabeda a Perjen contra l Fersina da les cinch, i Ponjins à vent 3a0 contra La Rovere e parejà 2a2 contra la Monti Pallidi