Mattarello – Fascia 1 – 1 (gol de Pezzei Michael)
Formazion del Fascia: Cincelli, Deflorian Gio., Gaspari, Trottner, Dellafior, Petrone (35’ s.t. Deflorian), Debertol, Piccoli, Toma, Dallio, Pezzei.
L’é n un a un che l’à l saor de na desfata chel ruà domenia passèda de contra al Mattarello. Mingol per l gol de la parità ciapà canche l nonanteisem menut l’éra jà passà da doi menuc, ma soraldut perché a chel moment de la endesfida l Fascia aessa cognù esser en vantac no demò de n gol ma de trei o cater, ajache Cincelli e compagnes à abù e falà sacotanta ocajions soraldut tel secondo temp.
Enceben che mencèa trei jiadores de nonzech, desche Porcu, Drlje e Cigolla, l Fascia à scomenzà la partida zenza cutia, scomenzan a jièr semper da la defendura zenza petèr via balons, troan dotrei bona jièdes soraldut de gra al gran lurier del joen atacant Nicolas Toma che no se à mai trat endò contra i più gregn defensores trentins, alincontra più che n’outa i li à metui te sach con sia velozità e braura. Aboncont i prumes carantacinch menuc i é passé a na vida piutost equilibrèda, coi ladins ampò più pericolousc dedant usc ma mingol imprezisc. L secondo temp l’é donca pontà via col medemo resultat del scomenz, chel dai vegeres. Ampò jà dai prumes menuc se entenea che i fascegn volea se portèr a cèsa la venta, spenjan semper più i parons de cèsa te sie mezciamp e troan l gol del vantac con Michael Pezzei, asvelt a controlèr na bala te la man dreta dei seidesc metres trentins e a trefèr l cianton giust.
L vantac ladin à fat scì che i trentins se petasse inant a chierir de drezèr l resultat, lascian coscì gran lèrga ai contrataches del Fascia. E l’é proprio a cauja de chisc che se rejona de delujion, ajache per cater o cinch outes, i jiadores fascegn se à troà soi contro l portier zenza mai troèr la giusta soluzion. Soraldut Dallio che su la man cencia, per trei outes aessa podù passèr sorì la bala te mez a Toma, preferian ampò proèr enstes la trata no troan mai chela giusta.
Sessaben dapò che la lege del balon no la dèsc redenzio e doi menuc dò l nonanteisem, dò che per dut l secondo temp i parons de cèsa no aea fat nia, su na trata dal cianton, l’é ruà l gol de la parità.
Per chel che vèrda l’èjit finèl del campionat, a doi partides da la fin, no muda seguramenter nia, ampò l braus te bocia l’é restà fort per chest venta mencèda. Autra lezion da tor e meter via per l davegnir.
Domenia che vegn, l Fascia jiarà sia ultima partida sul ciamp de Vich da les cater, contra La Rovere.
En cont de la squadra mendres, l fin de setemèna passà à jià demò la Juniores, perdan 8a2 contra l Borgo.
Doman, sabeda ai 21, jia duta la squadres: a Vich da les trei i Esordienc Fassa “A” contra Fassa “B” e da les cinch la Juniores contra l Verla. I Giovanissimi a Villa Agnedo da les cinch contra l’Ortigaralefre e i Arleves a Meano da les sie contra la Dolasiana.