Fascia – Verla 1 – 3 (gol Debertol)
Formazion del Fascia: Colusso Alessandro, Bernard Manuel, Trottner Luca, Deflorian Giovanni, Cincelli Patrick (35’ s.t. Rasom Pierpaolo), Lorenz Matteo (30’ s.t. Gianni Riz), Debertol Cristoforo, Deluca Daniele, Gabriele Riz (40’ s.t. Toma Nicolas), Zanoner Dimitri, Kola Pietro (15’ s.t. Cigolla Patrizio).
Contra l Verla, sul ciamp de cèsa, mister Chelodi domanea a sie jiadores de dèr seghit ai bogn resultac arjonc te la setemèna, co la venta en campionat contra l Monte Ozolo e chela mingol a sorpresa, en Copa Provinzia contra l’Ortigaralefre per doi a un. Ampò i joegn fascegn no i é stac bogn de meter ensema n’autra bona prestazion. Mingol fosc per la sfadìa de la partides jièdes, ma soraldut, e sun chest se cogn lurèr, per l fèr falà, de chiche pissèa fosc dò la bela venta en Copa, de esser jà na squadra forta e de no cogner corer e fèr fadìa per poder venjer la partides.
Presunzion chesta che l Verla à sobito ciapà a proprie vantac lascian i ladins zenza ponc a la fin dei nonanta menuc. E dir che enceben l Fascia no l’aea pontà via delvers la endesfida, Debertol su na trata dai unesc metres aea portà en vantac i sies e pech dò i patrons de cèsa podea enscinamai fèr l doi a nia.
Ampò se vedea franch che i jiadores cembrans metea te ciamp na maora gaissa e che l Fascia aessa fat fadìa a tegnir l vantac. E coscì l’é stat. Dò aer tegnù bot su n par de trates dal cianton, n burt eror te na ripartenza, à portà a na trata da cet giusta fora dai seidesc metres che Formolo à trasformà tel un a un.
La parità a la fin dei prumes carantacinch menuc podea esser conscidrà n resultat giust se no mingol strent per i ghesć che a n menut da la fin à falà na bona ocajion co l’usc belech vet.
L secondo temp, enceben la cridèdes e i mudamenc de l’alenador fascian, no l’é stat mior per i joegn de cèsa che dò mesora i se à troà sot de doi goi ruè endò più per demerit fascian che per braura di aversaries. Anter l secondo e terzo gol ampò, Trottner aessa abù l met de parejèr l resultat aldò de na trata dal cianton ma no se sà co, a n meter da l’usc à trat l balon fora.
Demò te l’ultim chèrt de ora, sot per trei a un, i ladins à abù la soramessa sui ghesć, troan più che na ocajion per scurtèr l desvantac ma oramai l’era tèrt.
N burt vèrech endò per Bernard e sozi che chesta domenia, ai ot de otober, sul senester ciamp de Grigno, i cognarà proèr a se meter da nef sul giust troi.
Resultac negatives ence per la squadra mendres di Juniores e Giovanissimi che à perdù 2 a 0 contra l Fiem e 8 a 2 contra l Trent (goi de Franco Bogni e Emiliano Cinzol). I Arleves à envers portà a cèsa n pont con n 2 a 2 contra l’Auta Valsugana (goi de Enrico Bernard). La soula venta la é ruèda dai Esordienc “A” per 3 a 0 contra la Rotaliana.
Chesta sabeda, la Juniores jia a Masen di Giovo contra l Verla da mesa les cater, i Arleves sa Vich da les sie contra l Telve, i Esordienc “A” semper sa Vich da les cater contra la Garibaldina, i Esordienc “B” a Molina contra da la medema ora contra l Fiem. Domenia, i Giovanissimi jia da mesa les unesc contra l Mezzocorona sul ciamp de cèsa.