Fascia – TNT Monte Peller 0 a 1
Formazion del Fascia: Lorenz Manuel, Bernard Manuel, Deflorian Giovanni, Trottner Luca, Cincelli Patrick, Lorenz Matteo (80’ Amplatz Bruno), Debertol Cristoforo, Rasom Luca (46’ Deluca Daniele), Cigolla Patrizio (60’ Kola Pietro), Riz Gianni (85’ Aleksi Julian), Zanoner Dimitri.
No l’é scomenzà delvers l campionat de Pruma Categoria per l Fascia Balon che, dò se aer calificà al secondo turno de la Copa Provinzia aldò de doi bela ventes contra Piné e Civezzano, no é stat bon de meter te ciamp la medema gaissa e chela organisazion de jech che servia per venjer contra i nonejes del TNT Monte Peller. Aversaries chisc che no à palesà esser più forc dei ladins ma che soraldut da la mesora inant à jià miec. L scomenz e fin al vintecincheisem l’era stat dut per l Fascia che aea tout te man l jech e abù n par de bona ocajions con Zanoner, ampò passà chesta pruma fasa, la lum se à destudà. I ghesć pian pian i se à fat inant falan n par de ocajions dant de troèr, a diesc menuc da la fin del prum temp, l gol del un a nia. N gol dassen fortunà ajache aldò de na trata dal cianton, la rebatuda del portieri Fascian, Manuel Lorenz, fenesc su la schena de n jiador nonesc e la se ficia te usc. Sot de n pont i bec de mister Chelodi no i troa la giusta reazion che se se podea spetèr, desche per auter jà vedù contra l Civezzano, ence perché i jiadores de maora esperienza desche Cigolla e Debertol, che aessa cognù vidèr la rengorsa, no i era te la dì miora e, sessaben, no se pel domanèr dut ai joegn. Purampò tant a la fin del prum temp che tel secondo, enceben seghitan a jièr piutost mèl, i joegn de cèsa aessa abù la ocajions per trèr ite l balon de la parità ma, n’outa l gol de Matteo Lorenz l’é stat anulà dal diretor de jech per n fal de man dut da veder e, n par de outes à falà Deluca e Zanoner. S’é rué donca al nonanteisem col resultat de un a nia e con gran delujion per chela che aessa podù e cognù esser na bona ocajion per pontèr via l nef campionat co na bela partida.
Fascia che cogn donca proèr a se meter sobito en linea chesta domenia, 17 de setember, sul senester ciam de Cavaleis de contra l Fiem. Partida ce vegnarà jièda da mesa les nef da sera.