Fascia – Telve 1 – 1 (gol de Cristoforo Debertol)
Formazion del Fascia: Lorenz Manuel, Bernard Manuel, Cincelli Federico, Deflorian Giovanni, Toma Nicolas, Debertol Cristoforo, Rasom Sebastiano, Pezzei Michael, Riz Gianni (35 s.t. Demarinis Giuseppe), Cigolla Patrizio (20’ s.t. Deluca Daniele), Riz Gabriele.
Dò aer perdù malamenter contra l’Auta Anaunia te la endesfida del lunesc de Pèsca, de contra a na squadra che più che l Fascia aea demò n atacant che l la petèa te usc, en domenia passèda la formazion ladina à desmostrà de poder fèr n muie miec. Sul ciamp de cèsa, de contra a n aversarie fort desche l Telve, terzo en clasifica, i jiadores de mister Chelodi, à jià co la giusta gaissa, con determinazion e a momenc metan ensema ence n bel jech. L prum temp l’é fenì col resultat dai vegeres ma se na squadra aessa cognù esser en vantac, chela cognea esser l Fascia ajache la doi miora ocajions les é ruèdes sui piesc de Pezzei e Riz che ampò no i é stac bogn de ge dèr la giusta forza a la trates. Da l’autra man, la defendura fascèna, amò òrfena de Trottner blocà da trei giornèdes de scalifica, la se à desmostrà conzentrèda e segura con Federico Cincelli e Giovanni Deflorian che no à falà nia.
Tel secondo temp la partida la é restèda equilibrèda enceben che l Telve à proà a spenjer mingol de più ma la soula ocajions che i à abù les é ruèdes su trata dal cianton. Da l’autra man l Fascia aldò de vèlch bela jièda l’é ruà dotrei outes apede usc, ampò zenza troèr l colp del un a nia.
Colp che alincontra à troà l’atacant ghest Sbaffo, asvelt a petèr te usc la rebatuda de Lorenz dò na gran trata de Micheletti che aea ciapà n efet dassen cert. A vint menuc da la fin e ferii dal resultat dalbon bujère, Bernard e compagnes à arbassà l cef, no per la delujion, alincontra per esser amò più zaches e spenjer dut chel che se podea chierian amancol la parità.
Sforz che l se à paà fora a diesc menuc da la fin canche na bela combinazion anter Deluca, Gabriele Riz e Debertol, à portà chest ultim a troèr na bela trata de cianch en diagonal che no à lascià redenzio al portier valsuganot.
Ampò l’un a un ge jia amò strent al Fascia, che à proà a troèr ence l gol de la venta ma la trates de Deluca e Riz les é states semper rebatude.
Al triple scìgol de Bontadi la sensazion di ladins l’é n mescedot de ira per no aer vent na partida jièda delvers e de legreza per aer dreza na endesfida che la se aea metù mèl, ma soraldut per aer desmostrà che se pel amò fèr zeche de positiv te na sajon senestra.
Chesta domenia, l Fascia jiarà sul senester ciamp de Calceranica da meza les set. Tel proscim articol fajaron a saer ence de l’èjit de la partida che i ladins arà recuperà jebia ai 12, contra l Monte Ozolo.
Per chel che vèrda la squadra mendres, demò i Esordienc dèsc sodesfazions, con n pareje e na venta contra Fiem e Piné. Giovanissimi, Arleves e Juniores à perdù (5a1 / 3a2 / 3a1) contra Trent, Ortigaralefre e Albian.
Chesta sabeda, i Giovanissimi jia da les sie a Mezzocorona, da la medema ora i Arleves jia a Borgo, da mesa les set la Juniores jia a Vich contra l Telve.