FASSA – SPORMAGGIORE 27 maggio 2018

Se à serà su co n’autra desfata la senestra sajon de la pruma squadra del Fascia Balon che, ence aldò de la venta del Redival contra l’Auta Anaunia, veit la formazion de mister Chelodi, zeruchèr te la Seconda Catergoria.

Te na dì de festa desche chela dei 40 egn, ruèr a se salvèr  fossa dassen stat desche se disc, la ciareja su la torta, ampò no la è jita fata.

La endesfida contra l Spormaggiore, fenida per un a nia per i ghesć, l’é stat l retrat de la sajon col Fascia ence mingol desfortunà che no é stat bon de trèr l balon te usc seence à abù desvaliva ocajions. Na partida che à moscià mingol i limic de la squadra e su chisc se cognarà jir a ge lurèr.

L’é passà dejenees da l’ultima outa che l Fascia à jià te la Seconda Catergoria e podessa someèr na gran desfata a livèl de sozietà, ampò, enceben che resta la gran delujion e l despiajer da man de duc, no l’é coscì.

Canche te l’aost passà l diretif dessema al nef alenador à volù dèr lèrga ai joegn che vegnia sù dai Arleves, piutost che domanèr a jent da fora de vegnir a jièr te Fascia, se saea jà che fossa stat engrà restèr tel campionat de Pruma Catergoria. A no didèr l’é sta ence dotrei situazions desche l’azident al jeneie de Kola che ge à fat sutèr dut l campionat d’aisciuda e l se trèr endò de Zanoner a la fin de l’uton, lascian coscì de fat la squadra zenza atacanc de peis.

L diretif del Fascia, l’an passà, à volù se meter dant n zil chièr e de valuta, che l’é chel de fèr crescer i joegn lascian l resultat sportif al secondo post. Obietif, che seence a zachei no ge pièsc,  à portà a n gran miorament de n muie de bec, no demò duc chi che se à alenà e à jià con gaissa te la squadra maora, ma ence di Arleves e Giovanissimi che à troà te Nicola Viale e Lorenzo Giuliani, alenadores che à sapù ensegnèr ence l valor del saer perder che fazile fèsc crescer più che venjer a dò dò.

Te chest  contest donca, l zeruchèr de la pruma squadra, enceben anter vèlch lègrema no vegn tout desche na tragedia ma alincontra desche oportunità de miorament. E per remarchèr che chesta direzion che vèrda  aldelà dei resultac, l’é chela giusta, l Diretif à volù renovèr l contrat col mister Chelodi amò acà n meis dant de saer coche la fossa jita a fenir. N atestat de stima proprie perché l lurier che l’é stat fat, à portà a aer n grop de bec bon de stèr adum ence te la dificoltèdes e che à semper remà da la medema. Merit del staff tecnich ma ence dei bec che anter veies e joegn à troà dalbon n bel leam e che ades, duc ensema i vèrda inant per n davegnir più lumenous, fidenc che duc i reste a dèr na man e che magari zachei vegne de outa per tegnir auc i colores de la val e de na sozietà che à semper fat e seghita a fèr dut chel che la pel per dèr l met a beleche doicent bec de jièr a balon.

L campionat se à serà sù co la festa de domenia, ence per duta la squadra mendres. N gran develpai va ence a duc chi che, zenza l luster mediatich de la pruma squadra, se à dat jù per endrezèr, alenèr e portèr stroz sacotenc bec: alenadores, colaboradores, sciofères e secretèra, zenza se desmentièr duc i sponsor e sostegnidores, privac e publiches che dèsc n contribut economich fondamentèl per jir inant.

L diretif l’é jà dò che l laora per la sajon che vegn, speran tel didament de duc chi che à didà chest an e bensegur avert a tor ite ence neves colaboradores che volessa se fèr inant.