Fascia – Solteri San Giorgio 4 a 1 (goi de Sebastiano Rasom, Gabriele Riz, Luca Trottner, Manuel Bernard)
Formazion del Fascia: Colusso Alessandro, Cincelli Federico (20’ s.t. Toma Nicolas), Trottner Luca, Giovanni Deflorian, Bernard Manuel, Debertol Cristoforo, Rasom Sebastiano (15’ s.t. Lorenz Daniele), Lorenz Matteo (18s.t. Lorenzo Rasom), Deluca Daniele(30’ s.t. Deflorian Giuseppe), Gabriele Riz (25’ s.t. Samuele Ruggiero)
Seghita con suzess l percors del Fascia Balon envers la Pruma Categoria. L resultat de cater a un, podessa dèr a entener che sie stat dut sorì, ampò coscì no l’é stat. Amancol per i prumes cinch menuc olache la defendura del Fascia no la se à fat troer ascorta su la pruma sortida d’atach di ghesć che co la pruma trata de la partida, na gran trata da manc dreta sot l remenat aut, i à troà l vantac.
La reazion ladina no la se à però fat spetèr e sobito, Deluca e compagnes, à tout l jech te man metan ensema una dò l’autra cater o cinch bona ocajions per drezèr l’èjit de la endesfida. L gol de la parità l’é ruà fosc aldò de la ocajion manco neta, co na trata de Sebastiano Rasom che no la era pissèda per fenir te usc ma na picola deviazion de n defensor, pressà da Riz, à fat scì che la bala fenissa ite per l’un a un.
L Fascia no se à fermà e pech dò à troà ence l vantac de gra a na gran trata sot l cianton de Gabriele Riz, che dò l malan muscolèr de l’utòn passà e n scomenz no proprie sorì, à troà te chesta ultima setemènes la forma e la gaissa dei dis miores. Segur n’as en più te la mènia de mister Chelodi per chest ultim meis e mez.
Troà l vantac l Fascia aessa ence podù serèr l descors jà dant de la fin del prum temp ma se à cognù spetèr la metà del secondo per l trei a un de Luca Trottner, asvelt a petèr te usc na trata da cet de Debertol, che dant Daniele Lorenz e dò da Matteo Lorenz aea slizià per pech.
Sul dopie vantac i joegn de cèsa aessa podù controlèr la partida ampò l’espulsion de Giuseppe Deflorian, te ciamp da pec menuc, à dat gaissa ai trentins che à proà a se spenjer inant troan ence n par de bona ocajions, soraldut con trates da cet. Su una de chestes l’é stat l remenat aut a salvèr l Fascia, su l’autres ge à pissà Colusso, enstouta dassen conzentrà.
Col Solteri dut inant restèa ampò n muie de spazie per i contrataches ladins che, più che n‘outa, à risćia de fèr ite l cater a un. Gol che l’é ruà proprie a l’ultim secondo su na trata dai unesc metres de gra a Manuel Bernard, chiamà a gran ousc dai joegn de la squadra mendres del Fascia che à da esser rengrazié per l bel sostegn con cores e batiman che dèsc a la pruma squadra te la partides jièdes en cèsa.
La formazion del President Ghetta con chesta venta no arjonc l prum post ajache ence l La Rovere à venciù, ampò ence coscì va ben perché la terza, la é ot ponc vindò, e ence chest podessa bastèr per la promozion ajache se anter la seconda e la terza squadra, l’é set o più ponc, la seconda passa dreta de categoria zenza fèr i playoff. Ampò l campionat l’é amò lench e no resta che venjer semper.
Scomenzan da chesta domenia contra l Giovo a Masen da les cater.
Per chel che vèrda la squadra mendres, la Juniores à vent 4 a 2 contra l’Oltrefersina (goi de Davide Rasom, Dennis Rasom e 2 de Paolo Zulian)e i Giovanissimi “B” à vent 7 a 0 (4 goi de Massimo Lorenz e un perom de Erik Costa, Pietro Longo e Francesco Serpa. Arleves, Giovanissimi “A” e Esordienc no à jià per la neif.
Chesta sabeda, la Juniores jia da les sie a Vich contra l’Albiano, i Giovanissimi “A” a Vigolo Vattaro da mesa les sie contra la Vigolana e i Giovanissimi “B” a Cloz da les cinch contra l’Anaune.
Domenia i Arleves jia a Vich da mesa les unesc contra la Ravinense.