Fascia – Redival 1 – 0
Formazion del Fascia: Colusso Alessandro, Bernard Manuel, Trottner Luca, Deflorian Giovanni, Toma Nicolas, Debertol Cristoforo, Rasom Sebastiano, Demarinis Giuseppe (30’ s.t. Cincelli Patrick, Cigolla Patrizio (35’ s.t. Bernard Fabio), Riz Gianni (10’ s.t. Deluca Daniele), Riz Gabriele (37’ s.t. Lorenz Matteo)
En domenia passèda sul ciamp Cotura de Vich, l Fascia à jià doi partites. La pruma de contra a la formazion del Redival, vegnuda jù da la Val de Peio. La seconda contra l cogner venjer a duc i cosć per poder seghitèr a restèr te la Pruma Categoria . E chesta l’é stat fosc la endesfida più senestra.
De fat, la pruma endesfida l joegn de cèsa i l’à venta tei prumes vint menuc, metan sot i ghesć tel jech e te la gaissa, troan l vantac de gra a na bela azion scomenzèda dal terzin cianch Demarinis, portèda inant da Toma e Cigolla, con chest ultim che à dat l’ultim passaje a Gabriele Riz che soul dedant usc no se à metù tema e à troà la giusta trata per l’un a nia. N gran bel gol che paa fora ence l joen da Ciampedel che da n trat no ruèa a slonfèr la rei. N’outa en vantac l Fascia aessa abù ence n par de bona ocajions per serèr sù l’èjit de la endesfida, ampò tant Riz che Toma no é stac catives assà dedant usc.
Jita la pruma mezora, l’é scomenzà la seconda partida, chela contra la prescion de no poder falèr e chest à portà l Fascia a non jièr più desche al scomenz petan demez l balon massa de bel ence canche se aessa podù jièr co la bala jabas zenza risćèr nia. Fajan coscì, se à dat fiduzia al Redival che enscin a chel moment l’era te na gran moza e coscì à proà pian pian a dèr vèlch cruzie a Trottner e compagnes. Cruzies che se cogn dir no i é mai rué ajache la fasa de defendura la é semper stata forta e i jiadores del Redival no à mai tirà te usc se no te n par de outes su trates da cet , ence chestes ampò mai pericolouses.
Fascia che enceben no jièa più delvers, à abù ence tel secondo temp più che n par de bona ocajions per troèr l doi a nia, a giusta conferma che la venta la era più che vadagnèda.
Trei ponc donca che l’é desche l pan per poder seghitèr a se jièr la permanenza te la categoria, ajache l Redival l’era demò doi ponc vindò l Fascia e con chesta venta i doenta cinch. N picol ma bon marjen che fajessa restèr l Fascia dedant al Redival, ence se se perdessa una de la ultima cater partides. Posibilità da tegnir en cont, conscidran che chesta sabeda ai 28 da les nef da sera, i bec de mister Chelodi i jia de contra al Borgo, soula squadra de duc i campionac de la Tèlia a aer vent duta la partides che à jià chest an, 30 su 30.
Fin de setemèna positif chel passà, ence per la squadra mendres. Dò la desfata di Arleves per 6 a 4 contra l Levico (2 goi de Nicolò Bavieri, Mattia Lastei e Emiliano Cinzol), l’é ruà demò ventes. 2 a 1 de la Juniores contra l’Oltrefersina (doi goi de Dennis Rasom), 3 a 2 dei Giovanissimi contra l Fiem (doi goi de Massimo Lorenz e Michele Zulian), 3 a 0 e 3 a 2 di Esordienc “A” e “B” contra Dolomitica e Civezzano.
Chesta sabeda, la Juniores jia sa Vich contra l’Audace da mesa les set, domenia i Giovanissimi jia a Mezzana contra la Solandar da mesa les unesc. I Arleves paussa.