Fascia – Predaia 2 – 0 (goi de Daniele Lorenz e Matteo Lorenz)
Formazion del Fascia: Colusso Alessandro, Deflorian Giovanni, Debertol Cristoforo, Bernard Manuel, Rasom Sebastiano, Lorenz Matteo, Lorenz Daniele, Rasom Lorenzo, Toma Nicolas (35’ s.t. Cincelli Patrick), Riz Gabriele (15’ s.t. Aleksi Julian), Deluca Daniele (42’ s.t. Lastei Mattia)
L’era da la quarta partida de campionat che l Fascia no metea ensema doi ventes de seghit e, dò aer vent contra la Cauriol domenia ai 11, l’obietif dei ladins apede sessaben ai trei ponc, l’era proprie chel de desmostrèr che se pel dèr seghit ai resultac ence co na formazion jona e zenza gran esperienza.
E enstouta no l’era dassen sorì, ajache sul ciamp de Vich ruèa na squadra zaca desche l Predaia e anter i joegn de cèsa mencèa cater jiadores che jia semper, desche Torttner, Cigolla, Pezzei e Gianni Riz.
Ampò i fascegn, zenza pissèr massa a chi che mencèa, à scomenzà sobito con gran gaissa troan dò pec menuc l vantac de gra a n gran gol de Daniele Lorenz. Daniele, dò aer recuperà bala te mezciamp, à slarià su la dreta envers Lorenzo Rasom e l se à petà sobito dedant usc, olache pec secondi più tèrt, prezis l’é ruà l cross de Lorenzo. Trata de tach e un a nia. Dassen na gran azion che à dat ai bec de cèsa l spirit giust per duta la endesfida. I ghesć no se à petà jù e à proà sobito a se fèr inant ampò la fasa de defendura fascèna à responet semper delvers coi doi “veiac” Debertol e Bernard dessema a Giovanni Deflorian che no i se à mai fat passèr via dai atacanc nonejes. De contrà a poder fèr ite amò n gol fossa stat proprie chi de cèsa che dotrei ocajions i les à abudes, con Riz e soraldut con Rasom con doi trates da cet. Una de chestes dò aer ciapà l remenat aut la é sutèda ite e fora de usc ma l diretor de jech no à vedù coscì, al carantacincheisem menut la squadres les é jites te deregoladoi sul un a nia.
Tel secondo temp se se spetèa na reazion amò più forta del Predaia, ampò l scomenz l’é stat na copia del prum. Autra bala recuperèda a mezciamp da Daniele Lorenz, slarièda enstouta su la cencia olache Deluca, dò aer sutà l’aversarie à petà dedant usc na bala che domanèa demò de essere spenta ite. A responer prejent ge à pissa danef Matteo Lorenz, al terzo gol te trei partides. Doi a nia.
Sot de doi goi i ghesć à mudà dotrei jiadores metan te ciamp neves atacanc che à defat dat mingol de gaissa al jech ma i ladins se à dat jù un più che l’auter per blochèr i aversaries. La soula dopia gran ocajion ruèda aldò de n forajech no scigolà, la é ruèda a vint menuc da la fin canche dant l remenat de dreta e dò chel aut, à dat na man al portier ladin a tegnir serà l’usc. Se podessa dir che zacan la bona sort la se à fat veder ence sa l Cotura de Vich, ampò la resta semper en debita envers l Fascia.
Dò chest spaent, i bec del President Ghetta aessa podù slarièr l resultat ma dotrei contrataches i é stac desfruté malamenter. Aboncont per chest’outa conta pech ajache la venta, i trei ponc e la bona luna i resta te Fascia.
Chesta domenia, ai 25 de november, l Fascia paussa. L’ultima partida de l’an se l temp lo conzet, vegn jièda endò sa Vich ai 2 de dezember.
L mior: Daniele Lorenz
Chel che aessa podù fèr miec: Nicolas Toma
En cont de la squadra mendres, la Juniores à perdù 2a0 contra l’Audace ampò l resultat l’é da confermèr ajache podessa esser stat na iregolarità te la formazion de Caldonazzo. I Arleves à pussà, i Giovanissimi “A” à vent 5a1 contra l Lavis (goi de Michele Zulian, Christian Tocco, Sebastian Cassan e doi Massimo Lorenz), i Giovanissimi “B” à perdù 3a1 contra l Levico (gol de Murtezi Erion), i Esordienc à vent 3a2 contra l’Auta Valsugana.
Chesta sabeda, 24 de november, la Juniores jia a Vich da les sie contra l Civezzano, i Giovanissimi “A” a Bedol da mesa les sie contra l Piné, e i Giovanissimi “B” da la medema ora a Ponte Arche contra l Comano.
Domenia, da mesa les unesc a Vich, i Arleves jia contra la Virtus Trento.