Fascia – Piné 1 – 1 (gol de Debertol)
Formazion del Fascia: Colusso Alessandro, Demarinis Giuseppe (30’ s.t. Cincelli Federico), Trottner Luca, Deflorian Giovanni, Bernard Manuel, Debertol Cristoforo, Rasom Sebastiano, Pezzei Michael, Lorenz Matteo, Cigolla Patrizio (30’s.t. Riz Gianni), Riz Gabriele
Se à serà sù con en un a un la emportanta endesfida de domenia passèda anter l Fascia e l Piné. N resultat che no muda nia te la clasifica ajache ence la formazion del Redival che la se troa sobito vindò l Fascia, à parejà restan coscì a doi ponc de destach. Ampò l moral de la doi squadres a la fin dei nonanta menuc l’era dassen desferent. I pinaiteres contenc del pont vadagnà, i fascegn endespiajui per i doi ponc perdui aldò de una de la miora partides de chesta aisciuda.
L scomenz de la partida l’é equilibrà ma la pruma gran ocajions per troèr l vantac les é dei ghesć, che per doi outes i é pericolusc dedant usc. Dant co na trata de cef ben blochèda da Colusso e pech dò con n bati e rebati a n meter da l’usc olache i atacanc à falà no se sà co la trata.
Dò chest spaent l Fascia à tout te man la partida e à metù sot i aversaries. A parejèr la ocajions da gol ge à pissà Gabriele Riz e Patrizio Cigolla, ampò ence ic falan. L prum soul contra l portier no à troà l’usc per pech, l secondo à vedù sia bel trata passèr via l portier ma se fermèr contra l remenat aut.
La prescion dei ladins no la se à però chietà e a la mesora l’é ruà l vantac. Bela azion de Manuel Bernard de Jef su la man dreta, cross de chest che vegn petà fora dai seidesc metres olache l’é Debertol che co na trata de sgol troa l cianton giust olache l portier pinaiter no pel ruèr. L’un a nia l’é l giust recognosciment al sforz fat dai joegn de cèsa che va coscì a la paussa col moral aut.
L scomenz del secondo temp ampò no l’é positif per l Fascia che tei prumes diesc menuc, sopesc la reazion e l mudament de modulo de jech del Piné, ciapan l gol del un a un.
Troà la parità, i ghesć à sobito sbassà l ritm e de contra i fascegn à proà a reagir se petan inant con gaissa e determinazion. Te l’ultima mesora tiré soraldut da la gran partida de Matteo Lorenz, l Fascia à metù ensema trei cater bona ocajions ampò no troan mai l giust varech per passèr endò dant tel resultat.
N gran pecià ajache, enceben che l Piné no à robà nia, la venta la fossa stata meritèda e soraldut l Fascia aessa podù se portèr a +4 sui solandres del Redival e esser mingol più chiec per la ultima doi partides.
Chesta domenia, per la radunanza di alpins, duta la partides de balon del Trentin no les vegn jièdes.
La partida che vegn sarà donca ai 20 de mé, da les cater domarena sul ciamp de Pardac contra la Dolomitica.
Tel fin de setemèna passà, la Juniores à parejà 4 a 4 contra l Solteri (goi de Josnet Bernard, Julian Aleksi, Leo Pollam e Milovan Anackov), i Arleves à perdù 4 a 2 col Valcembra (goi de Anwar Defrancesco e Nicolò Bavieri), i Giovanissimi à pussà, i Esordienc “A” à vent 3 a 1 contra l Fiem.