Rua l prum pont de la sajon par l Fascia Balon degrà l pareje madurà contra l Ortigaralefre. Ti prumes menuc de la endesfida le i ghesc che ten l jech ma zenza ge dar cruzies a la defendura fasciana. A la pruma grana ocaion rua l gol ghest co l atacant che da pec pas met l balon te sach. Do aer ciapà gol Trottner e compagnes va n bambola e i riscia de ciapar l secondo gol co na trata da i 11 metres che ven parada da Simone Rasom de Rajum. la partida la seghita coscita con i ghesc che ataca e i bec de mister Capovilla che se defen. Ti secondi carantacinch menuc le n autra endesfida con i fascegn che ciapa semper più ciamp e i proa a drezar da endesfida e al 60’ rua l gol fascian, Sebastiano Rasom de Gotart met n bel balon par Michele Petrone del Pat che l proa la trata da tanche ite l area de rigor, l portier para e su la rebatuda rua Erik Costa Parolot che de ciaf l met l balon te sach. Do esser rue al pareje i ladins se ngaissa e i proa a segnar l secondo e a n cart de pra da la fin rua na gran ocajion, l clas 2008 da Cianacei, Tomas Ngresi, l pasa via n par de aversaries el met l balon tel mez de area par Patrizio Deville de Bronza che no le bon de ruar a tirar. Ti ultimes menuc no sozede nia da nonzech. Rua l prum pont par i bec de pres Trottner eche proarà a portar a ciasa i 3 ponc n domenia da mese le 4 contra l Azzurra al Cotura.
Tel fin de setemana le tacà ence la seconda categoria olà jia l Fassa “B” che a perdù par 3 a 0 contra l Valsugana n sabeda passada. Na endesfida engrada par i joegn fascegn ajache muie jiadores no era degrà problemes de lurier e a cognù jiar bec che le le prume oute che i jia te na categoria si auta. La partida la e tacada sobito con doi goi ghesc, un le stat n autogol e un co la trata da i 11 metres, ol jir da la partida i bec de mister Saverio Petrone a proà a la dreza ma zenza esser bogn e a pec menuc da la fin le ruà ence l terzo gol valsuganot. I ladins proarà a se rifar n sabeda da mese le 9 contra l Roncegno al Cotura.
Pierpaolo Rasom
Simone Rasom, Tomas Ngresi, Lorenzo Riz(dal 1’st Michele Petrone), Davide De Pellegrini, Tommaso Gloder, Luca Trottner, Patrizio Deville(dal 41’st Michele Zulian), Gianni Riz, Sebastiano Rasom(dal 18’st Sebastian Cassan), Alessandro Crepaz(dal 35’st Alexander Weiss), Erik Costa(dal 18’st Massimo Lorenz). All. Alessandro Capovilla
FASSA – ORTIGARALEFRE 7 SETTEMBRE 2025
