FASSA – ORTIGARALEFRE 25 marzo 2018

Fascia – Ortigaralefre 1 – 3 (gol de Daniele Deluca)

Formazion del Fascia: Lorenz Manuel, Cincelli Federico, Trottner Luca, Deflorian Giovanni, Cincelli Patrick, Debertol Cristoforo, Lorenz Matteo (1’ s.t. Riz Gabriele, 38’ s.t. Demarinis Giuseppe), Pezzei Michael, Cigolla Patrizio (35’ s.t. Aleksi Julian), Riz Gianni (20’ s.t. Rasom Sebastiano)

Dò n’invern che zacan se pel endò chiamèr coscì, olache freit e neif no é mencià, pian pian, fosc massa pian, ence i ciampes de balon scomenza a se viventèr. A la dir duta, la Federazion da Trent che la é mingol vercia e che no la capesc che sa mont enscin amancol a la metà de mèrz a balon no se pel jièr, l’aea programà l scomenz del campionat de pruma categoria ai 25 de firé ma, enlouta l fiochèa ence te zità e coscì ence la domenia dò, tant che beleche duta la pruma partides les é states sburlèdes de n par de setemènes.

Ades, enceben mingol tardives, ve conton del senester scomenz del Fascia Balon che anter mile dificoltèdes  à pontà via i alenamenc ai 22 de jené, anter la palestra de la scoles de Poza, corses fora per paìsc e viajes sui ciampes de Bronzol, Caldar, Terlan e Steinegg giusta per poder jièr mingol col balon.

L temp no à segur didà a se alenèr delvers e la desfates de la pruma partides l’é segur ence mingol na conseguenza de chest. Ampò ogne partida à abù sia istoria e i joegn del Fascia se à semper dat jù fin a la fin no molan mai. La pruma partida contra l Fiem, à vedù i ladins padir con orden tel prum temp conzedan demò n par de ocajions ai fiamaces che i aea segur zeche de più, restan ampò a la fin dei prumes carantacinch menuc sul 0 a 0. Al scomenz del secondo temp l’é ruà però l pont del un a nia de gra a na trata de cef de Bolgiani. Sot de n gol l Fascia à proà con gaissa a troèr la parità metan sot l Fiem restà a vint menuc da la fin con n om de manco. Purampò la sort no à didà e dò vèlch bona ocajion l diretor de jech à scigolà la fin.

Te la seconda partida contra l Verla, se à jià sul ciamp de erba faussa de Masen di Giovo, che l’é l più strent de dut l campionat. Chest no à didà la squadres a majenèr jech e se à vedù na endesfida zenza ocajions che aessa cognù fenir col resultat dai vegeres se no fossa che, na sbalonèda de n defensor de cèsa, se à tramudà te n assist prezis per l’atacant cembran che co na trata de sgol à troà l “gol de la domenia”. Un a nia e resultat che l Fascia no é stat bon de drezèr ence per colpa del diretor de jech che a cinch menuc da la fin no à dat na trata dai unesc metres dassen evidenta ence a dita dei jiadores del Verla.

Te l’ultima partida, domenia passèda, sul ciamp finalmenter vert de Vich, a bater l Fascia l’é stat l’Ortigaralefre. Na desfata, desche la pruma contra l Fiem, che se podea meter en cont ajache l valor di aversaries l’era gran. Ampò l’à fat mèl per coche la é ruèda. Defat i bec de mister Chelodi somèa jièr no demò de contra ai ghesć ma ence contra la malasort e tel secondo temp ence contra l diretor de jech, tant che a la fin dei nonanta menuc, l portier ghest se à utà envers i fascègn dijan endespiajù “chesta ve l’aon robèda”. La pruma pèrt de endesfida à vedù i valsuganoc tor te man l jech aboncont zenza fèr trop. La sia miora ocajions les é ruèdes demò de gra a erores tei passajes anter i defensores ladins e l gol del vantac l’é stat n regal del portier de cèsa che à lascià jir la bala dedant usc dò aer parà na bela trata. Tel secondo temp l Fascia se peta inant con Deluca e Gabriele Riz che proa a drezèr l resultat ma l’é l’Ortigaralefre a troèr l secondo e terzo gol te pec menuc. L doi a nia l’é l’emblem de la malasort co la bala che per cater outes la vegn rebatuda dai ladins e per autertanta outes la rua dò aer smacà su ceves, jeneies e schenes, sui piesc di atacanc aversaries.

Sot de trei goi l Fascia no mola, ge proa amò e se fèsc inant. Troa l trei a un co na trata de Deluca, aessa troà  pech dò l trei a doi su na trata dal cianton e aessa ence abù derit a na trata dai unesc metres con conseguente cartelin ros per l defensor. Ma l diretor de jech, sul possibol secondo gol fascian, l’é stat l soul a veder n fal ladin anulan coscì l gol e n atim dò l’é stat l soul a no veder n più che evident fal su Gabriele Riz che jia soul te usc. Per la serèr sù deldut a na vida storta, l’é ruà ence l cartelin ros a Trottner che sutarà coscì amancol doi partides.