Rua autres 3 ponc par l Fascia Balon che i a venciù n domenia 3 a 0 contra l Matarel. Taca sobito ben i bec arcedè da miaster Cigolla che do trei menuc podesa passar inant ma la trata de Patrizio Deville de Bronza fenes fora dal speie de l usc. Col jir di menuc i fascegn seghita a atacar ma zenza che rue ocajion da nonzech. Tel fenir de la pruma part de la endesfida rua l ocajion ghesta co n rigor, ma la trata da i 11 metres ven parada da l joegn portier fascian Simone Rasom de Rajum. Ti secondi carantacinch menuc la musega no muda coi ladins che spenc par troar l gol dal vantac e i trentinoc che se defen. Do n cart de ora i ghesc resta de 10 degrà a l espulsion par reazion de sie atacant. Con n om de più Trottner e compagnes se engaissa e i proa amò con più convinzion a troar l gol chel l rua al 70 co na trata da 11 metres che Sebastiano Rasom de Gotart met te sach. Do chest gol i ghesc se disunes e i fascegn i ne profità dant con Massimo Lorenz de Meca che ben metù de dant a usc dal joen moenat Sami Said met l balon jun som a l usc e do con Samuele Ruggero che met l balon te sach a usc vet do l passaggio de Massimo Lorenz. Na bona venta par i bec de Pres Ghetta chen domenia proaarà a portar endodanef i 3 ponc ai pie de Sas da le Doudes contra l Mezzocorona da le 6 da sera a Mezombart.
Tel fin de setemana a jià ence i Arleeves ceh a venciù contra l Alta Anaunia par 6 a 2 con 3 goi de Michael Prinoth, 2 goi de Simone Zanoner e un de Sebastian Cinzol.
Pierpaolo Rasom
Simone Rasom, Gianni Riz, Davide De Pellegrini, Matteo Lorenz(dal 35’st Sebastian Cassan), Giovanni Deflorian, Luca Trottner(dal 40’st Giacomo Deflorian), Massimo Lorenz, Michele Petrone(dal 20’st Sami Said), Sebastiano Rasom(dal 26’st Matteo Bernard), Samuele Ruggero, Patrizio Deville(dal 15’st Gabriele Riz). All. Luciano Cigolla
FASSA – MATTARELLO 3 MARZO 2024
