No l’é tacà te la miora vida l campionat 2018/19 del Fascia Balon ajache i ladins à portà a cèsa demò n pont. Dò aer venciù l giron de Copa Provinzia de gra a la ventes contra Cauriol, Cornacci e Giovo, le ruà la pruma de campionat olache i joegn fascegn se à endesfida contra La Rovere. L scomenz de la partida no l’é stat positif per i tousc arcedè da mister Chelodi che i é stac metui sot dai jiadores, dassen più esperc, de La Rovere che i li à schicè te sie mez ciamp. I ghesc, enceben che i à serà i parons de cèsa, i à abu pecia ocajions per troèr l vantac te la pruma part de la partida. La soula outa che i a metù n dificoltà i fascegn l’é stat co na trata da pech fora l’area de rigor che l portier Colusso à devià fora con na gran parèda. L temp se à serà sù con na bela azion dei parons de cèsa con n bel cross de Manuel Bernard da la dreta che Gianni Riz a petà fora de pech sora l remenat aut. La seconda pèrt de la endesfida se verc con l Fascia muie più atif che à dat muie cruzies a La Rovere che mingol per malasort e mingol per pecia prezijion no à porta inant i fascegn. La maora ocajion de l secondo temp la é ruèda sui piesc de Bernard che, do la parèda del portier ghest su n cross de Rasom Lorenzo, un dei miores del Fascia tei secondi carantacinch de jech, se à troà l balon tei piesc e, enceben da na posizion senestra, à tirà te usc n balon ras al teren che l portier per pech no l se à trat ite enstes vindò schema. N gran pecià ajache se podeà tachèr miec la sajon e che se i joegn del Fascia no aessà regalà n temp a i aversaries i aessa podù portèr a cèsa i trei ponc. Chesta domenia i fascegn jiarà contra la Dolasiana sul ciamp de Vich da mesa les set.
L mior: Lorenzo Rasom
Chel che aessa podù fèr miec: Gianni Riz
Formazion: Alessandro Colusso, Luca Trottner, Cristoforo Debertol, Giovanni Deflorian, Gianni Riz (1’ st Lorenzo Rasom), Matteo Lorenz(25’ st Gabriele Riz),Sebastiano Rasom, Michael Pezzei, Manuel Bernard, Patrizio Cigolla, Giuseppe Deflorian(30’ st Julian Aleksi).