Fascia – Civezzano 1 – 1
Cincelli, Bernard, Trottner, Deflorian Gio., Dellafior, Debertol, Porcu, Pezzei (30’ s.t. Dallio), Petrone, Cigolla, Azizi
No la é ruèda nience enstouta la venta che duc spetèa te cèsa Fascia e l resultat de parità sutà fora dai nonanta menuc, lascia n gran braus te bocia ai ladins che più che autra outes aessa merità de portèr a cèsa i trei ponc.
La partida l’era una de cheles da venjer contra a n aversarie de medemo livel e i joegn de cèsa i lo saea. Coscì, dò n prum risech te i prumes menuc olache Cincelli à metù na peza, Trottner e compagnes à scomenzà a fèr jech troan ence dotrei bona jièdes, ampò mencian de pech l pont del vantac, dant co na bela trata de Porcu fora de zentimetres, dò con Azizi e Cigolla.
I prumes carantacinch de jech se à sera sù zenza goi ma col Fascia che palesea de poder meter sot i ghesć. E coscì, fora dai deregoladoes, i fascegn à spent amò chel tant che à bastà per troèr l vantac. Trata da dalenc de Dellafior che Azizi de cef à desvià te usc.
L’un a nia à dat fiduzia e gaissa ai ladins soraldut te la fasa de defendura, olache i vardea de no conzeder nia ai trentins. Dut jia delvers enscin a la mesora canche Azizi, dò aer ciapà cater peèdes una dò l’autra zenza che l diretor de jech scìgolasse, à abù na burta reazion che ge à costà l secondo cartelin śal, lascian i compagnes de diesc. Bensegur se cogn dir che Azizi à falà, ampò se l’om dal scigolot aessa blocà l jech a la pruma peèda ciapèda dal joegn del Fascia, e no a la quarta, fosc zeche fossa mudà.
Chest fat à portà mingol de biteboi te ciamp che seguramenter no à didà l diretor de jech che da lò a pech, à falà na dezijions dassen sorida, lascian jir n forajech coscì evident che se l vedea ence da Sènt Ugèna jù.
E sessaben, te chest moment olache nia va, chest eror à dat l met al jiador d’atach trentin Pretti, de se troèr soul contra Cincelli che nia à podù su la trata. L’un a un à fat inirèr duc i fascegn, tant i jiadores e che la jent su la tribunes. Fat l gol e co n jiador de più te ciamp, i ghesć à proà a se venjer la endesfida ma l Fascia no à conzedù più nia e alincontra à troà ence l’ocajion per l vantac con Cigolla che, a l’ultim menut, aldò de na trata dal cianton, aea trefà l cianton giust. Pecià, che l portier ghest che per duta la partida no l’era sta proprio prezis, enstouta l’é sgolà a petèr fora de usc la bala.
Un pont per om donca che no encontenta nesciugn, manco che manco i ladins che de ponc à de besegn desche del pan.
Domenia che vegn da mesa les trei, Debertol e sozi sarà a Lases de contra al Lona per na endesfida da ite o fora.
Ejit no massa positif ence per la squadra mendres, co na soula venta di Arleves per 5a0 e doi desfates de Giovanissimi 5a2 e Ponjins 3a1.
Arleves e Giovanissimi che jiarà l’ultima partida de l’an, sabeda a Vich da les sie contra la Ravinense i prumes, domenia da mesa les unesc a Vigolo Vattaro contro la Vigolana i secondi.