Fascia – Cauriol 3 – 1 (goi de Matteo Lorenz, Sebastiano Rasom, Gabriele Riz)
Formazion: Colusso Alessandro, Trottner Luca, Cincelli Patrick, Löwe Gregor (20’ s.t. Deflorian Giovanni), Rasom Sebastiano, Lorenz Daniele, Rasom Lorenzo (20’s.t. Bernard Manuel), Pezzei Michael, Lorenz Matteo(30’ s.t. Deflorian Giuseppe), Cigolla Patrizio(15’s.t. Toma Nicolas), Riz Gabriele
L Fascia l’é prum. Chesta l’é la neva più grana de l’ultim ròdol de campionat del giron “C” de la Seconda Categoria.
Aessa cognù esser l’ulitma partida de la sajon del Fascia sul ciamp de cèsa ma, co la previjions che dajea neif e l risech de no poder jièr, la direzion fascèna à resservà l ciamp de Bronzolo per poder se jièr fora la partida zenza la cogner recuperer daveder can.
Ampò l ciamp neuter no l’é stat n gran ostàcol per la formazion ladina, coscì desche no l’é stat la Cauriol che, enceben che contra l Fascia ge la met semper duta e fosc ence zeche de più, à palesà lìmic evidenc.
L temon del jech l’é stat semper te la mans dei joegn del Fascia, enstouta dassen amò più joegn de semper, ajache mister Chelodi, zenza Debertol e Deluca, à lascia te banch ence Bernard, metan te ciamp l soul Cigolla sora i treta egn e fajan esordir dal prum menut l doimiledoi Gregor Löwe da Ciampedel.
Dò set menuc l Fascia passa jà en vantac de gra a Matteo Lorenz e dut somea sorì ma doi menuc dò, su na disatenzion de la defendura, i fiemaces troa sobito l pareje con Morandini. Fat e fat nia ampò la direzion de la endesfida no muda coi ladins a fèr l jech e i aversaries a se defener. Al venteisem l’é Sebastiano Rasom con n tiro-cross a gabolèr Vecchi e troèr l nef vantac.
Trottner e compagnes aessa podù e cognù serèr sù la partida jà tel prum temp, ampò é mencià mingol de convinzion e cativeria agonistica coscì, enceben che tei secondi carantacinch menuc desche tei prumes, la Cauriol no la é stata mai pericolousa, demò a cinch menuc da la fin Gabriele Riz à troà l trei a un e metù la parola fin al derby.
Trei ponc vadagné e soraldut l prum post arjont. Per ades demò de gra al fat che La Rovere à pussà e l’à na partida de manco. Ampò endena l Fascia l’é dedant e mingol de prescion en più i trentins i l’arà.
Per la promozion mencia ades n soul pont che i ladins proarà a vadagnèr jà chesta domenia contra l Predaia sul ciamp de Taio da mesa les cater. Medemo aversarie che l Fascia troarà trei dis dò tel stadie Briamasco de Trent, te la finèla de Copa Provinzia olache duc é envié a tor pèrt e sostegnir la squadra de Fascia.
Per chel che vèrda la squadra mendres, la Juniores à perdù 3a1 contra l Fiem (gol de Jannes Debertol), i Arleves à vent 2a0 contra l Redival (goi de Milovan Anackov e Mattia Lastei), i Giovanissimi “A” à vent 7a2 contra l Civezzano (4 goi de Massimo Lorenz, un per om de Michele Zulian, Erik Costa e Jacopo Sommavilla), i Esordienc à vent 3a2 contra l’Alta Valsugana. I Giovanissimi “B” no à jià per la neif.
Chesta sabeda ai 11 de mé, la Juniores jia a Masen di Giovo contra l Verla da les cinch e i Giovanissimi “A” semper contra l Verla a Vich da mesa les sie.
Domenia, i Arleves jia a Albian da mesa les unesc e i Giovanissimi “B” da la medema ora a Vich contra l Comano.