FASSA – CALCERANICA 11 settembre 2016

Fascia – Calceranica 0 – 0
Lorenz, Bernard, Debertol, Deflorian Gio., Dellafior, Porcu (15’ s.t. Trottner), Pezzei, Petrone, Toma, Dallio, Cigolla.
L’era da doi setemènes che scrivane de coche la pruma squadra del Fascia Balon, enceben perdan la partides de Copa Provinzia, la se enjignèa per la pruma de campionat che, tel cef de mister Bernardin, l’era chela da no falèr. E l’èjit de la endesfida à dassen palesà de coche i jiadores fascegn i fosse enjigné delvers a se bater contra l Calceranica che se à dalbon desmostrà na formazion n muie n muie forta, piena de jiadores de categoria maora. L resultat finèl zenza goi, g’é jit mingol de travers ai valsuganoc ajache i era vegnui te Fascia forc de sie valor e segures de se n jir coi trei ponc. Apede chest l’é da dir che tel cors dei nonanta menuc i à abù desvaliva ocajions ciapan n par de remenac auc e troan n Manulel Lorenz te na dì de grazia che à rebatù colp su colp la trates di ghesć.
Dijan coscì ampò pel someèr che l Fascia aesse abù demò bona sort a no perder, enveze, ence se mingol de bona sort no à mencià, deldut coscì no la é stata. Chest zero a zero vegn fora aldò de dut chel che i ladins aea endrezà te doi setemènes de alenamenc, per rebater a la maora calità dei jiadores aversaries, co na gran organisazion de squadra, conzedan demò doi outes ai forc atacanc de trèr te usc aldò de azions. Duta l’autra ocajions che i à abù, les é ruèdes da la trates dal cianton e da cet, tirèdes a na vida dassen semper pericolousa dal trentin Anderle.
Se dal pont de veduda del endrez defensiv Debertol e compagnes é stac béleche perfec, manco ben l’é jit l jech de atach, fosc ence perché se à lurà de manco te chest meis de preparazion, mingol per mencianza dei atacanc e mingol perché desche dis semper mister Bernardin, se cogn ponter via dal troèr segureza e chesta se la troa no ciapan gol. Ampò n par de bona ocajions per temp i les à abude ence i fascegn e la prestazion di atacanc la é stata seguramenter positiva, desche chela de duta la squadra. En cont de gaissa e empegn dassen no se pel ge dir nia a nesciugn.
N bel bon pont vadagnà donca, e ence vèlch bona neva desche l retorn te ciamp de Cigolla dò l malan ai leamenc del jeneie.
Chesta domenia sun ciamp de Vich rua n’autra formazion forta, l Gardol, che dessema al Calceranica proarà a venjer l campionat. Ampò l Fascia desche fat domenia passèda proarà a mantegnir l Cotura zenza desfates te campionat desche fat per duta la sajon passèda.
La partida vegnarà jièda da mesa les cater.
Chest fin de setemèna scomenza ence l campionat dei Giovanissimi, che jia a Vich sabeda ai 17 da les sie da sera de contra a l’Ortigaralefre.