Fascia – Altopiano Paganella 2 a 2 (goi de Sebastiano Rasom e Matteo Lorenz)
Formazion del Fascia: Colusso Alessandro, Trottner Luca, Deflorian Giovanni (37’ s.t. Cincelli Federico), Bernard Manuel, Rasom Sebastiano, Riz Gianni (30’ s.t. Defrancesco Anwar), Lorenz Matteo, Pezzei Michael (35’ s.t. Lastei Mattia), Rasom Lorenzo (15’ s.t. Debertol Cristoforo), Cigolla Patrizio, Deflorian Giuseppe (25’ s.t. Lorenz Daniele).
L’é n pareje che sà de desfata chel arjont dal Fascia a cinch menuc da la fin contra l’Altopiano Paganella ultima squadra en clasifica.
L’é n Fascia che no sà dèr seghit a la bona parides de l’ultima setemènes.
L’é n grop, chel de mister Chelodi, che cogn crescer amò n muie e l lo cognessa fèr più prest possibol.
Se l resultat de parità de la domenia dant contra l Monte Ozolo, aea lascià l braus te bocia perché i fascegn aessa dassen vadagnà i trei ponc de gra al bon jech e a la gaissa palesèda, l doi a doi de chesta partida, lascia te bocia, se se pel, na saor amò più braussa, ajache enstouta l no aer vent, l’é dut per merit o miec, per colpa dei jiadores de cèsa.
Dant de pontèr via l messaje de l’alenador l’era stat chièr: “Via i eies da la clasifica e gran gaissa dal prum mentu per proèr a serèr la partida tel prum temp”.
Ampò coscì no la é stata e i bec de cèsa à metù te ciamp l più burt prum temp de la sajon con sacotenc erores e soraldut zenza gaissa e zenza endrez. Demò l valor schiet dei ghesć à fat scì che al carantacincheisem menut l resultat fossa de un a un, aldò de doi trates dai unesc metres. Praticamenter la soula trates te usc del prum temp.
Te la seconda pèrt de la partida l Fascia à proà a fèr zeche de più, se trajan inant più co la gaissa che col cef, ampò a troèr endò l vantac l’é stat i trentins de gra a n’autra trata dai unesc metres conzeduda per n fal de man n muie dubie. Amò sot tel resultat i ladins à tirà fora la ombies dajan l miec de chesta endesfida, troan sobito l doi a doi co na trata de Matteo Lorenz e seghitan dapodò a schicèr i aversaries te la propia area metan ensema trei cater gran ocajions, falèdes dalbon per n nia.
Metan ensema dut e conscidran la ocajions, ai ponc aessa segur vent l Fascia, ampò tel balon conta demò i goi e al triple scìgol del diretor de jech, sul tabelin resta l numer doi. Doi a doi l resultat e doi vèresc endò de Debertol e compagnes.
Chel che lascia chesta partida l’é segur n gran lurier, soraldut de cef, che va fat se se vel crescer e arjonjer obietives emportanc.
Per chel che vèrda la squadra mendres, l’é ruà trei bela ventes de gra a la formazions A e B dei Giovanissimi 5a1 e 4a0 contra Civezzano e Gardolo, e ai Esordienc 2a1 contra l Fiem. La Juniores alincontra à perdù un a nia semper contra l Fiem.
Chesta sabeda, da mesa les sie i Giovanissimi “B” jia a Perjen e la Juniores da les sie a Vich contra l Verla.
Domenia la Pruma Squadra jia da mesa les trei a Juan contra la Cauriol, i Arleves a Vich da mesa les unesc contra l Porfido Albiano e i Giovanissimi “A” da les unesc contra l Verla a Masen di Giovo.