Formazion del Fascia: Cincelli, Pezzei, Bernard, Trottner, Petrone, Debertol, Porcu, Piccoli, Bolgiani, Zanoner (35’ s.t. Nicolodi), Deluca (30’ s.t. Deflorian Giu.).
Mior scomenz no se se podea spetèr da man de la pruma squadra del Fascia Balon, che dò se aer jià fora la partides de Copa Provinzia mingol desche proes per l campionat, en domenia passèda à moscià n spirit desvalif e na convinzion maora. Ghest sun ciamp Cotura de Vich l’éra endò l Fiem, formazion che aea jà batù i ladins per doi a un te la pruma partida de Copa. Acà doi setemènes però l Fascia se aea mingol sconet canche i fiemaces aea metù jù la miora formazion. Enstouta enveze a la squadra da Cavaleis mencèa trei cater jiadores de calità ampò al scigol de scomenz, l resultat l’éra chel dai vegeres e i jiadores te ciamp unesc contra unesc. Apede jù l’é da dir che ence al Fascia mencèa Drljie, Deflorian Giovanni e Gaspari, donca na mesa defendura, ampò Pezzei terzin e Bernard defensor te mez à dassen jià delvers. L’é stat na venta vadagnèda chèla dei parons de cèsa che à fat pesèr la maora esperienza e calità soraldut da metà ciamp en sù olache zenterciampisć e atacanc à venciù la endesfides dretes contra i aversaries.
Fascia che l’é jit en vantac dò n chèrt de ora zirca, de gra a Debertol, asvelt a rebater te usc da pec metres na bala zenza paron. Gol emportat che à dat gaissa e l met de jièr con mingol manco prescion. Ciapà l gol, l Fiem à proà a spenjer de più ma no l’à mai troà l met de dèr cruzies a Cincelli, ben didà dai denfensores che se la vedea coi jiadores più zaches dei ghesć, soraldut Valle. L resultat de un a nia a la fin del prum temp no l’éra da costionèr. I secondi caranticinch de jech à palesà amò de più la desferenza en termen de calità anter la doi squadres, en favor de la formazione del president Ghetta. I jiadores de Cavaleis zenza gran resorses, à scomenzà a lascèr più lèrga te mez ciamp conzedan coscì bon jech ai fascegn che à metù ensema dassen de bela jièdes. Ampò per l doi a nia ge à volù na invenzion de Daniele “Paco” Deluca che dò aer robà bala a mez ciamp, à vardà l portier, l lo à vedù mingol fora de usc e l lo à saetà co na trata maraveousa da carantacinch metres. Doi a nia e gran festa. Legreza da una, ceves basc da l’autra. Sun chest resultat i ladins à vardà de controlèr ge lascian ampò doi ocajions ai ghesć, ben blochèdes da Cincelli, ma per esser amò più chiec e no risćèr l vegnir de outa di aversaries, l Fascia à spent amò inant, troan sul fenir de la garejèda, l trei a nia de gra a na trata de cef de Piccoli, aldò de n super cross de Deflorian.
Dassen n bon scomenz donca per la formazion de mister Bernardin che speron posse seghitèr coscì jà chesta domenia, de contra l Gardol semper sul ciamp amich de Vich, da les cater.
Chesta sabeda scomenza l campionat ence per la Juniores che jiarà sa Vich contra l Telve.