Formazion del Fascia: Cincelli, Petrone (40’ s.t. Deflorian Giu.), Gaspari, Deflorian Gio., Drlje, Pezzei (1’ s.t. Bernard), Porcu, Piccoli, Bolgiani, Deluca, Zanoner
Chel de chest an l’é n Fascia che no à intenzion de molèr e la desmostrazion più grana se l’à abuda proprie te l’ultima partida jièda en domenia passèda de contra l’Aquila Trent, formazion pruma en clasifica, canche sot de doi goi a nience vint menuc da la fin, Bolgiani e compagnes à troà la forza e la convinzion per jir a ciaper l’ègua che sgolèa tant aut.
L’é stat na partida smezèda en doi no demò da la paussa anter l prum e l secondo temp, ma proprie te la vide de jièr de la doi squadres.
I prumes carantacinch menuc i é stac duc de marca trentina con i jiadores ladins fosc mingol agité per la valuta de la endesfida, col soul Cincelli a tegnir vif l Fascia co na serie de parèdes a la Gigi Buffon. Cincelli che però nia ò podù a la mesora canche su na trata dal cianton, n defensor trentin é ruà dant de duc e co na bela trata de cef da pec metres à troà l bus giust per l’un a nia. Sot de n gol l Fascia à proà a meter orden te la idees e tel jech, jian mingol miec i ultimes diesc menuc ampò la soula trata da scriver sul tabelin del prum temp la é ruèda con Deluca al caranteisem menut ampò zenza cruzièr massa l fort portier trentin. L vantac de l’Aquila a la fin del prum temp l’é stat donca dassen vadagnà.
Giusta fora da deregoladoi la musega someèa no esser mudèda, co la trates dei defensores ghesć envers i atacanc che metea belebon en dificoltà la squadra de cèsa, soraldut per merit del fort atacant trentin Bazzanella, dassen na sita co la bala tei piesc. E proprio el, dò n chèrt de ora à troà l bel gol del doi a nia che someèa meter l chiovertech a la partida ence perché i jiadores fascegn parea aer cusà l colp. Ampò, canche ence l’ultima bronza someèa se destudèr, l’é ruà n colp de vent à viventèr l fech: Zanoner venc n duel te mezciamp e dèsc la bala a Bolgiani che dò aer sutà l prum aversarie, profita de n eror del secondo e l se troa con mingol de bona sort soul dedant usc troan l pont del doi a un co na trata de ponta. L gol dèsc neva gaissa al Fascia che scomenza a spenjer e a meter ensema dotrei bona ocajions. La più grana la rua a Zanoner che dò na trata de Deluca blochèda co la ombies dal portier trentin, l se troa co la bala tei piesc, soul dedant usc col portier aversarie amò jabas. Ampò la trata de l’atacant de Ciampedel, te n periodo no proprie fortunà, trefa l remenat aut. La bona sort ruèda en ocajion del prum gol parea jà esser se n jita ma no l’era coscì ajche, tel secondo menut de recuperament, aldò de na trata dal cianton de Porcu, Denis Drlje troa l gol no più sperà de la parità.
Doi a doi e Fascia che tegn alò, semper a demò doi ponc, la pruma en clasifica.
De segur no l’é stat una de la miora partides de chesta sajon per i bec de mister Bernardin e sessaben che ence i sostegnidores fascegn tegnia a veder l Fascia venjer sul ciamp de cèsa, ampò chest resultat, coscì desche l’é madurà, pel esser ciapà desche na venta e dèsc al Fascia, maora convinzion per l davegnir. Fascia che cognarà ampò porter a cèsa trei ponc jà da la endesfida che vegn, contra l Lona Lases, doman sabeda 31 de otober a Lases da mesa les trei.
Chisc i resultac de la squadra mendres: 1a1 de la Juniores contra l’Ortigara, desfates per 3a2 de i Arleves contra l Fiem, per 8a1 dei Giovanissimi contra l Valcembra e per 2a1 di Esordienc “B” contra la Monti Pallidi. I Esordienc “A” à fat 2a2 contra l Fiem “B”.
Insnet, vender 30 da les ot, la Juniors jia a Caldonazzo contra l’Audace, doman i Giovanissimi jia a Vich da les sie contra l Telve. L’autra formazions les paussa.