DOLOMITICA – FASSA 20 maggio 2018

Dolomitica – Fascia 2 a 0

Formazion del Fascia: Colusso Alessandro, Patrick Cincelli (35’ s.t Cincelli Federico), Trottner Luca, Deflorian Giovanni, Toma Nicolas, Debertol Cristoforo, Rasom Sebastiano (40’ s.t. Rasom Dennis), Lorenz Matteo (20’ s.t. Demarinis Giuseppe), Cigolla Patrizio, Rasom Lorenzo (10’ s.t. Deluca Daniele), Riz Gabriele.

Cognea esser la domenia che portèa a la serenità enveze, la se à tramudà tel pior strassomech, col Fascia che à perdù per doi a nia e col Redival che à vent un a nia contra la seconda en classifica. Chisc resultac porta coscì i ladins al penùltim post e co la possibilità semper mendra de se salvèr.

Mencia demò na partida a la fin del campionat ma venjer contra l Spormaggiore, domenia sul ciamp de Vich, podessa no esser assà. Se l Redival cognessa venjer ence contra l’Auta Anaunia, l Fascia jissa de zeruch te la seconda categoria.

Vardà ben ampò, che seence chest cognessa esser, no fossa dassen n drama ajache l gran lurier che l’é stat fat coi joegn chest an, l’é la più gran venta de la sozietà e sessaben che, per solit, se semena te na sajon, ma  se tol sù te chela dò.

Vegnan a la partida, se cogn dir che l’é stat na endesfida equilibrèda con momenc miores per na squadra e etres per l’autra. Na partida no proprio bela fosc ence per la pievia e l ciamp pesoch. La desferenza anter venjer e perder la é stata dalbon minimala ajache la ocajions é stat peces, dotrei per man. Ampò la Dolomitica à desfrutà miec dei ladins la ocajions troan n gol per temp che Debertol e compagnes no à sapù rebater.

N Fascia che à padì la mencianzes de jiadores desche Manuel Bernard, Michael Pezzei e Gianni Riz, che fosc aessa portà te ciamp mingol più de esperienza, aboncont, se cogn dèr amò n’outa merit ai tenc joegn che no se à mai trat endò. Ence domenia passèda, cinch del 2000 un del 2001 dal scomenz e tel cors dei nonanta menuc l’é stat metù te ciamp autres doi del 2000. Tolan fora i doi più veies, Debertol e Cigolla, n’età media de 22 egn.  N sedim fort per fèr sù tel davegnir.

Per chel che vèrda la squadra mendres, la Juniores à perdù 6 a 0 contra l Borgo, i Giovanissimi à parejà 3 a 3 contra l’Arco, i Esordienc “A” à vent contra la Monti Pallidi 3 a 0, i Esordienc “B” à perdù 1 a 0 contra la Dolomitica.

Chesta sabeda vegn jià fora la ence la ultima partides di joegn: la Juniores jia a Grigno contra l’Ortigaralefre da les sie, i Arleves jia a Vich da la medema ora contra la Vigolana, i Giovanissimi jia a Vich da mesa les cinch contra l’Anaune, i Esordienc “B” jia a Masen di Giovo contra l Verla da les cinch.

Desche se veit, duta la partides de la squadra mendres vegn jià de sabeda ajache domenia, l Fascia Balon fèsc festa per i 40 egn.  Siede duc envié a tor pèrt a la festa.