Fascia – Monte Ozolo 2 – 1 (gol de Patrick Cincelli e Cristoforo Debertol) jièda en jebia ai 12 de oril
Calceranica – Fascia 0 – 1
Formazion del Fascia: Colusso Alessandro, Cincelli Federico, Trottner Luca, Deflorian Giovanni, Toma Nicolas, Debertol Cristoforo, Rasom Sebastiano, Pezzei Michael (40’ p.t Demarinis Giuseppe), Cigolla Patrizio, Riz Gianni, Riz Gabriele (20’ s.t. Aleksi Julian)
L’é stat na setemèna de auc e basc per l Fascia che dò aer vent en jebia ai 12 na partida fondamentèla contra l Monte Ozolo, à perdù contra l Calceranica per un a nia.
La partida de jebia à vedù n bon Fascia tel prum temp, ampò no bon de troèr l gol enceben che se aesse abù n par de bona ocajions. Tel secondo temp alincontra i ladins à jià mèl troan però l vantac de gra a Patrick Cincelli e soraldut al portier ghest che à falà la preisa sul cross del joen da Poza. Troà l vantac Bernard e compagnes se à defenet zenza gregn cruzies enscin a cinch menuc da la fin canche su na trata dal cianton i nonejes à spent te usc l balon de la parità. Canche someèa dut fenì l’é ruà però l’ocajion giusta per jir endò en vantac. Trata da mez ciamp a chierir Federico Cincelli, metù ite pec menuc dant desche chèrta de la desperazion, e defensores aversaries che i ge sauta ados l trajan jabas. L’era l nonantacincheisem menut. Trata dai undesc metres che Debertol enstouta no fala. Doi a un e pruma venta de l’aisciuda.
Col moral mingol più aut aldò de la venta, la formazion ladina, enceben zenza trei cater jiadores, en domenia passèda la se à trapinà sul ciamp de Calceranica volan dèr seghit ai bogn resultac.
L’aversarie no l’era de segur chel più sorì ajache la squadra de cèsa, dò l Borgo che à jà vent l campionat e che se à palesà massa fort per chesta categoria, l’é chèla che à fat l numer maor de goi. Con chest pensier, i bec de Fascia à jià na partida ascorta te la fasa de defendura ma à proà ence a jièr delvers dedant olache soraldut tel prum temp, Pezzei e Gabriele Riz, à abù doi bona ocajions per troèr l vantac, ampò falan la trata finèla. Da l’autra man l Calceranica à tegnù mingol più te man l jech metan mingol de prescion ai defensores ladins ma zenza mai cruzièr l portier. I prumes carantacinch menuc de jech i se à coscì serà zenza goi.
L scomenz de la seconda pèrt de endesfida à vedù i valsuganoc proèr a spenjer mingol de più ence de grà a n par de sostituzions che à dat maor calità ai undesc de cèsa canche l Fascia à alincontra cognù fèr con demanco de Pezzei e de Gabriele Riz bloché l prum da na destirèda e l secondo da na paca al jeneie.
Dò n par de bogn intervenc da man de Colusso a mantegnir la parità, la cativa sort la se à endò metù te anter canche, a vint menuc da la fin su na trata dal cianton, na bala passèda anter trei cater jiadores, l’à smacà contra l jeneie de Cincelli che no à abù l temp de se spostèr, se fician te usc.
Gol del un a nia che sarà ence l resultat al triple scìgol ajache la gaissa e bona volontà dei joegn de mister Chelodi no é stat assà a drezèr l resultat.
Chesta domenia, sul ciamp amich de Vich, l Fascia se jiarà na partida fondamentèla per restèr te la categoria, jian da les cater contra l Redival.
Per chel che vèrda la squadra mendres, la Juniores à vent 2 a 1 contra l Telve (goi de Mario Toma e Dennis Rasom), i Arleves à perdù 4 a 2 contra l Borgo (goi de Anwar Defrancesco), i Giovanissimi à perdù 2 a 1 contra l Mezzocorona (gol de Michele Zulian). De bela ventes per 3 a 1 e 3 a 0, l’é ruà enveze da la squdres di Esordienc A e B contra Fiem e Valcembra.
Chesta sabeda, la Juniores jia a Madran da les sie contra l’Oltrefersina e i Arleves a Moena da les cinch contra l Levico. Domenia da mesa les unesc, i Giovanissimi jia sa Vich contra l Fiem.