Rua ence chesta outa na venta par l Fascia Balon che n domenia passada a venciù na partida muie engrada contra l Azzurra. Part sobito miec i joegn fascegn che do doi menuc con Michele Petrone del Pat che do n azion de contropè no le bon de meter jun som al sach da soul contra l portier. Pasa 5 menuc e le i parogn de ciasa a passar inant con a bala mal perduda da i bec de mister Cigolla che i mana te usc l atacant de ciasa che le bogn de passar via Simone Rasom con n pallonetto. Do aer ciapà l gol, Trottner, vegnù ite endò da l infortunio, e compagnes proa a se petar inant a drezar sobito la endesfida con trate da dalonc che no fenesc te sach. Al trenteisem ruassà l gol del pari con Patrizio Deville de Bronza che però l ven anulà ajache par l diretor de gara l balon le stat tocià de man. Pech do rua n autra ocajion par i trentinoc con a trata da i 20 metres che Simone Rasom de Rajum le bon de parar dajan na trata dal cianton che no ven desfrutada. A cinch menuc da la fin de l prum temp se fasc amò più engrada la partida par i fascegn ajache Gianni Riz de Peta ven petà fora do aer ciapà la seconda amonizion. Te la seconda part de la endesfida i bec de Pres Ghetta i va te ciamp con amò più gaissa par proar a drezar l resultat. Sobito rua la pruma ocajion par i joegn fascegn con Michele Petrone che ciapa l remenat aut do na trata da posizion muie defilada. Par proar a far l gol da 1 a 1 i fascegn se spenc muie inant e i trentinoc proà a jir n contropè ma le pecie ocajon che i a creà no a dat cruzies a la defendura ladina. Co l passar di menuc i fascegn das muie cruzies a la defendura de ciasa ma zenza ruar a meterl balon jun som al sach. A 5 menuc da la fin rua l prum gol fascian, Massimo Lorenz de Meca ven petà ju te area de rigo dal portier de ciasa, l diretor de gara das l rigor par i fascegn e Sebastiano Rasom de Gotart le bon de l mudar n gol. Mencia 5 menuc e i fascegn vel venjer la endesfida e tel recupero le bon da far l gol de la venta, trata longia de Michele Petrone che proa a ge la passar a Patrizio Deville, defensor i lo antizipa ma l balon rua a Alessandro Crepaz, l class 2003 da Reba l proa la trata da i 20 metres che ven deviada da Patrizio Deville ma l defensor le bon de parar ma no le bon de l petar via, l balon resta ti pie de Patrizo Deville che i la pasa a Massimo Lorenz lasa da soul da la defendura de ciasa e l met l balon jun som al sach. Gran proa de caratter par i bec de mister Cigolla che n 10 par più de 50 menuc i e bogn de portar a ciasa i 3 ponc e l ciaf da la classifica, na venta ence par l president Ghetta che n sabeda passada a fat 75 egn. Na venta ence par i muie tifous che dute le setemane va do la squadra sia n ciasa che fora par sostegnir i fascegn, che, a dita de i jiadores, somea de jiar semper n ciasa. N domenia i fascegn cerirà de fenir su l giron de andata da prumes de la clas co na venta contra l Perjen da mese le 3.
Tel fin de setemana la juniores a venciù par 3 a 0 ocntra l Telve con doi goi de Jacopo Sommavilla e un gol de Erik Costa, i Arleeves a perdù par 6 a 1 contra l Borgo con gol de Sebastian Cinzol, i Giovanissimes a perdù par 1 a 0 contra la Dolasiana, i esordienc “A” a perdù par 3 a 2 contra l Val de Cembra “C”, i esordienc “B” a perdù par 3 a 0 contra l Porfido Albian, i ponjins “A” a venciù 3 a 0 con l Fiem “D”, i ponjins “C” a perdù par 2 a 1 contra l Fiem “D”.
Pierpaolo Rasom
Simone Rasom, Gianni Riz, Alessandro Rasom, Gabriele Riz(dal 25’st Matteo Bernard), Giovanni Deflorian, Luca Trottner, Massimo Lorenz, Michele Petrone, Sebastiano Raosm, Samuele Ruggero(dal 25’st Alessandro Crepaz), Patrizio Deville. All. Luciano Cigolla
AZZURRA – FASSA 20 NOVEMBRE 2022
