Rua la pruma venta te chest campionat par l Fascia Balon degrà la venta ruada contra l Audace. Do aer passa l prum turno de la “coppa Trentino” degrà la venta contra la Cornacci par 4 a 1 i bec de mister Capovilla i e jic a proar a portar i 3 ponc a ciasa sul ciamp dassen engrà de Caldonazzo. Ti prumes menuc part miec i parogn de ciasa che ten l balon e i proa a ge dar cruzies a la defendura fasciana e do n cart de ora rua l gol valsuganot co n cross devià che rua dret sui pie a l atancant de ciasa che da doi pas no fala. Do aer ciapà gol Riz e compagnes i e jic mingol n fantia e 10 menuc più tart i parogn de ciasa podesa troar l gol dal 2 a 0 co na trata dai 11 metres ma Simone Rasom de Rajum no le dacort e l para la trata. Ti scondi carantacinch menuc la musega muda e le i joegn fascegn a far jech par proar a drezar la endesfida e do n cart de ora rua l gol de pareje, na bela azion tacada da Gianni Riz Peta che con n par de passajes con si compagnes l rua a tirar, la trata ven deviada da n defensor e l balon rua sui pie de Erik Costa Parolot che da soul te dant al portier no fala e met l balon te sach. Do esser stac bogn de parejar i ladins de engaissa e 2 menuc do rua l gol de la venta, ven sigolà n fal sui 25 metres, sul balon va Erik Costa che con so trata l desegna n arcaboan che fenes tal set. Col jir di menuc le i ghesc che se peta inant a proar a troar l gol del pareje zenza dar de gregn cruzies ai bec de mister Löwe. Someassa che la partida jie a fenir coscita ma ti ultimes menuc la diretora de la endesfida da n autra trata da i 11 metres a i parogn de ciasa degra n fal de man mingol dubie, fosa na mazada par i fascegn ma Simone Rasom de Rajum fas valer la soa fama de “pararigori” e l para ence l secondo rigor. 2 menuc più tart i fascegn pel festejar la pruma venta. Na venta suada par i bec de Pres. Trottner che però i ge a cardù fin a la fin e i è stac bogn de portar i 3 ponc a l ombria de sas da le doudes e n domenia i proarà a da seghit a chesta venta contra la Vigolana da mese le 4 al Cotura.
Tel fin de setemana la seconda squadra a venciù l derby contra la Cornacci par 8 a 2 jian na partida a momenc perfetta vidè da n Michele Petrone de Pat n gran giornada segnan ben 4 goi, al festa dal gol a partezipà ence Claudio Iori, Fabio Bernard, Diego Platter e Stefano Mich.
Le tachè ence i campionac de le squadre mendre co la juniores che a venciù par 2 a 1 contra l Telve con 2 goi de Simone Zanoner, i Arleeves a perdù par 7 a 0 contra l Calisio, i giovanissimes a parejà par 3 a 3 contra l Pinè con 2 goi de Thomas Rizzi e un de Nathan De Palma e i esordienc “B” a perdù par 2 a 4 contra l Val de Cembra.
Pierpaolo Rasom
Simone Rasom, Gianni Riz, Davide De Pellegrini, Gabriele Riz(dal 35’st Alexander Weiss), Tomas Ngresi, Tommaso Gloder, Sebastian Cassan(dal 49’st Pierpaolo Rasom), Matteo Bernard(dal 27’st Adil Bouchrik), Massimo Lorenz, Alessandro Crepaz(dal 30’st Roberto Del Negro), Patrizio Deville(dal 13’st Erik Costa). All. Alessandro Capovilla
AUDACE – FASSA 21 SETTEMBRE 2025
