Rua la terza venta par l Fascia balon che n domenia a venciù contra l Primier. Part sobito ben Trottner e compagnes che i met n esser l bel jech che se proà vigni setemana e i schicia te soa area i ghesc che no i pel nia. Do 10 menuc pasa i bec de mister Cigolla co na trata da i 20 metres de Samuele Ruggero che met l balon jun som al sach do aer recuperà n passaje falà da la defendura primierota. Col passar di menuc i ghesc tol te man l jech e proa a drezar la endesfida ma la defendura fasciana la e bona de se defener zenza dar cruzies al portier de ciasa che demò na outa a cognù far na bela parada su na trata da tanche ite l area de rigor. Ti secondi 45 menuc part miec i ghesc che seghita a proar a portar l punteggio pari ma zenza dar cruzies a la defendura fasciana , do n cart de ora rua l secondo gol fascian de gra na gran trata da i 25 metres de Matteo Lorenz che fenesc te sach zenza che l portier posa far nia, pasa 3 menuc e i joegn fascegn podesa passar endò ma la trata da ite l area de rigor de Alessadro Rasom fenesc dreta sul remenat aut. I ghesc no ge stas e i se peta duc inant per calar i gol de dejavantac ma i rua demò na outa a cruzier la defendura fasciana ma Deflorian le bon de parar. Con i ghesc duc inant i bec de president Ghetta part n contropè e a cinch menuc da la fin rua l gol de la venta con Massimo Lorenz che te dant al portier no l fala e coscita l met n “ghiacciaia” la partida. Bela partida par i joegn fascegn che a desmostra che l Cotura le sue “fortino” de gra le trei vente su trei. N domenia i jiarà par la pruma outa te chest campionat dalonc dal Cotura contra l Val di Cembra a Masen di Giovo da mese le 4.
Te l fin setemana a tacà a jiar ence le squadre mendre. La partida de la Juniores la è stata riviada, i Arleeves a venjù contro l Borgo par 4 a 2 con 3 gol de Sebastian Cinzol e 1 gol de Sami Said e i giovanissimes a venciù par 16 a 2 contra l Perjen con 6 gol de Michael Prinoth, 3 goi de Simone Zanoner, 3 goi de Alexander Weiss, n gol par om de Gabriele Rasom, Adam Rizzi, Thomas Liberatore e Thomas Gabrieli.
Leonardo Deflorian, Alessandro Sorarù(dal 22’st Gianni Riz),Alessandro Rasom, Matteo Lorenz(dal 32’st Matteo Bernard, Giovanni Deflorian, Luca Trottner(dal 38’st Patrick Cincelli), Massimo Lorenz, Michele Petrone, Sebastiano Rasom, Alessandro Crepaz(dal 1’st Gabriele Riz), Samuele Ruggero(dal 22’st Patrizio Deville). All. Luciano Cigolla
FASSA – PRIMIERO 18 SETTEMBRE 2022
