Setemana positiva par l Fascia balon che le stat bon de vencer dute doi le endesfide che i aea, n mercol a batù la Dolomitica par 4 a 1 te la copa “trentino” e n domenia a batù l Telve. Na partida engrada contra na squadra tanche vegnuda ju da la promozion. La endesfida la taca miec par Trottner e compagnes che do 10 menuc riscia de passar inant con la trata da tanche fora l area de rigor de Samuele Ruggero che brinca l remenat aut, sobito do rua la responeta dei ghesc con l somior biado che no le bon de petar te usc l balon degra na bela parada de Leonardo Deflorian. Do chesta sparduda i bec de mister Cigolla i taca endò a attacar a cerir l gol del vantac ma zenza esser bogn de segnar, dant a proa Michele Petrone con a trata de cianc da i 16 metres che la sigolà l remenat aut e do con Samuele Ruggero che semper dai 16 mestres no le bon de troar l cianton. Te la seconda part de la endesfida le semper i joegn fascegn che spenc e do n cart de ora i passa n vantac con l nef ruà Alessandro Crepaz, l 2003 de Rèba la metù jun som al sach l balon do na gran azion de Massimo Lorenz che, dant a sutà n par de omegn, e do la passa l balon giust giust par l nef atacant fascian che no se a fat prear e a segnà l gol del vantac. Pasa 10 menuc e i ghesc ciapa n rigor degra n fal de l portier che falà la sotida e la petà jabas l biado de area de rigor che no le stat falà enceben Deflorian i l aea beleche ciapà. Do aer ciapà l gol i bec de Pres. Ghetta i proa a jir endò inant e a n cart de ora da la fin rua l gol de la venta con n gol fortunà de Gabriele Riz che, do n autra bela azion de Massimo Lorenz che le ruà jun som al ciamp, la petà te mez l balon che l defesor per proar a sbalonar da lonc da so area a ciapà dret te l ama l joegn da caimpedel e l balon le ruà te usc. Ti ultimes menuc i ghesc a proà da drezar la endesfida ma zenza dar cruzies a la defendura fasciana. Bela venta par i joegn fascegn che proarà a tor endò da nef i trei ponc contra l Primier al Cotura da mese le 6 da sera n domenia ai 18 de setember.
Pierpaolo Rasom
Leonardo Deflorian, Alessandro Sorarù, Alessandro Rasom(dal 18’st Tommaso Gloder), Matteo Lorenz(dal 35’st Gianni Riz), Giovanni Deflorian, Luca Trottner, Massimo Lorenz(dal 45’st Giacomo Deflorian), Michele Petrone, Sebastiano Rasom, Alessandro Crepaz(dal 28’st Gabriele Riz), Samuele Ruggero ì(dal 40’st Mirko Barcatta). All. Luciano Cigolla
FASSA – TELVE 11 SETTEMBRE 2022
