ALTA ANAUNIA – FASSA 10 OTTOBRE 2021

Par la terza setemana de seghit l Fascia balon porta a ciasa ponc degrà a 1 a 1 madurà sul engra ciamp de Ronzone contra l Alta Anaunia. Scomenza ben la endesfida par i fascegn che do doi menuc i rua apede al 1 a 0 con na trata de Matteo Lorenz che la fenesc auta. Mingol ala outa i parogn de ciasa ven fora da l so mez del ciamp e proa a dar festidech a la defendura fasciana ma zenza mai brincar l’usc. Sul mez de l prum temp rua n autra ocajion par Deflorian e compagnes con Sebastiano Rasom che do na respinta curta de la defendura nonesa l proa a far gol con a trata dai 20 metres che scigola vejin al set dajan l’ilujion del gol. Te la seconda part de la endesfida i bec arcedè da mister Cigolla i va n vantac degrà na granazion de Patrizio Deville che sauta doi aversaries e met te mez l balon per Samuele Ruggero che da doi pas da l’usc no l fala. Mingol do rua l fat che muda la endesfida, Samuele Ruggero se fas petar fora. Co n om de manco i fascegn se a sbasà a defener e ntorn l 35’del secondo temp i a ciapà l gol del pari co n rebalton te area che le fini con l gol dei nonesc. Podesa ruar ence l secondo gol de parogn de ciasa ma degrà a na gran parada d Colusso la endesfida fenesc 1 a 1,. I bec fascegn i proarà a venjer edo da nef n domenia contra la Garibaldiana al “Cotura” da mese le 4.
Tal fin de la setemana la juniores a paussà, i Arleeves a venciù l derby contra l Fiem par 4 a 2 con goi de Sebastian Cinzol, Mattia Roldo, Daniel Chiocchetti e Simone Rasom, i giovanissimes a venciù contra l Montevaccino par 2 a 1 con 2 gol de Thomas Liberatore, i esordienc “A” a perdù contra l Pinè par 7 a 4, i esordienc “B” a venjù contra la Dolomitica par 13 a 4, i Pulcini “A” a venjù contra la dolomitica par 8 a 4 e i pulcini “B” a perdù par 3 a 1 contra l Alta Valsugana.
Pierpaolo Rasom
Alessandro Colusso, Alessandro Sorarù, Patrick Cincelli (dal 15’st Alessandro Rasom), Matteo Lorenz, Giovanni Deflorian, Tommaso Gloder, Samuele Ruggero, Michele Petrone, Sebastiano Rasom, Mirko Barcatta (dal 30’st Jacopo Sommavilla), Patrizio Deville (dal 40’st Enrico Bernard)