Enceben i aessa jià na gran partida ence chesta outa l fascia balon no l porta a cèsa ponts. Lorenz e compagnes en domenia passèda a jia a Martignan contra una de le prume de la clas : l Calisio. La partida la è scomenzèda con l Calisio inant che do n cart de ora l passa con l so mior jiador che co na trata de cef la batù l portier fascian. Do l gol ciapà i fascegn a tacà a jièr e dant che l diretor de la endesfida sigolase doi oute i e jic vejin al gol con Massimo Lorenz, jit ite te ciamp do l malan che è sozedù a Petrone, co na trata dai 20 metres. L secondo temp le stat dut de marca fascegna che a proa te dute le maniere a segnèr le tant sperà gol del pareje che i se fossa merità; Kola, Lorenza Massimo, Deflorian Giovanni i a metù a dura proa la defendura de cèsa che con valch stent è stata bon de resister e portèr a cèsa i trei ponts. Gran proa per i tousc de pres. Ghetta che proerà setèmena che ven a venjer contra l Verla al Cotura de Sen Jan da meses les 3.
Te la schedres mendres grigna demò la juniores che à venjù 5 a 1 contra l Perjen con goi de Bernard Fabio, Lastei Mattia, Rasom Pierpaolo, Riz Lorenzo e Zulian Paolo. I arleves a perdù contra l Calisio 2 a 1 con gol de Erik Costa, i giovanissimes a pareja 0 a 0 co l’Ortigaralefre e i esordienc “A” a venjù 3 a 2 con l Valcembra e i esordienc “B” a perdù 4 a 1 contra l Pinè. Setemèna che ven la juniores jierà contra l Fiemme a Zian da les 5 sabeda ai 2 de november, i Arleves jierà domenia ai 3 de november contra l Verla a Masen di Giovo da meses les 11, i giovanissimes jierà sabeda ai 2 de November a Trent contra la Virtus Trento da meses les 7 da sera e i esordienc pausserà.
Pierpaolo Rasom
Formazion:
Colusso Alessandro, Petrone Michele (dal 10’ pt Lorenz Massimo), Riz Gianni, Melecci Riccardo, Deflorian Giovanni, Cincelli Patrick, Lorenz Matteo, Riz Gabriele (dal 30’ st Glöder Tommaso), Rasom Sebastiano, Ruggiero Samuele (dal 10’ st Kola Pietro), Rasom Lorenzo (dal 35’ st Toma Nicolas)