Adige – Fascia 0 – 2 (goi de Samuele Ruggiero e Gabriele Riz)
Formazion: Colusso Alessandro (20’ s.t. Mostallino Francesco), Löwe Gregor (40’s.t. Gloder Tommaso), Trottner Luca, Toma Nicolas, Rasom Sebastiano, Debertol Jannes (30’ s.t. Bernard Matteo), Rasom Lorenzo, Lorenz Matteo, Riz Gabriele, Bernard Manuel (35’ s.t. Lastei Mattia), Ruggiero Samuele (20’ s.t.Deflorian Giovanni)
Dò na setemèna de gran festa per la promozion, la venta de la Copa e ence la noza del pilèster de la defendura, Luca Trottner, ai joegn del Fascia no restèa che se jièr fora l’ultima de campionat de contra l’Adige. Na partida che, se La Rovere no aessa vent sia endesfida contra la Dolasiana, aessa podù dèr l prum post de la clasifica ai ladins. Resultat che aessa dat amò maor luster al campionat ma che de fat no mudèa nia ajache la promozion la era jà te gofa da n trat.
Ampò dò vint menuc sul ciamp de Roveré de la Luna, i parons de cèsa venjea jà trei a nia, coscì sul ciamp de l’Adige, se à vedù n Fascia jà mingol en vacanza, zenza gran gaissa e conzentrazion e l prum ciaut de la sajon no à seguramenter didà.
La soramessa del Fascia no la é mai stata en discuscion ajache l’aversarie l’era dassen mender ampò i ladins, à fat ite demò doi goi, un per temp de gra a Samuele Ruggiero e Gabriele Riz, falan sacotanta ocajions.
Se volon, metù da na man l resultat, la soula nota de enteres de la partida l’era veder coche se comportèa dotrei joegn de la squadra di Arleves, de l’an 2002, che mister Chelodi ha volù meter te ciamp per fèr sci che i scomenze a tor confidenza co n jech mingol più aut e fèr coscì mingol de esperienza per l’an che vegn.
Jà perché encomai l’eie l’é out envers a la sajon che pearà via a la fin de aost e che vedarà la formazion ladina se bater contra aversaries più forc, cognan ampò fèr con demanco dei “veies” Debertol, Deluca, Bernard e Cigolla, che fazile, dò egn e egn de jech, lasciarà alò de jièr.
Ampò, dant de pissèr al cent per cent a la neva sajon, l’é amò temp de fèr festa ajache, chesta domenia ai 2 de jugn, l Fascia Balon envia duc sul ciamp de Vich, da les diesc inant, per festejèr la pruma squadra ma ence i Giovanissimi de mister Giuliani che à vent l campionat e duc chi che se à dat jù per na bela sajon rica de sodesfazions. L program ponta via co la partides dei più picoi, la messa da mesa les doudesc, marena per duc e jeghes dut l domarena.