Predaia – Fascia 1 – 2 (goi de Nicolas Toma)
Formazion: Colusso Alessandro, Bernard Manuel, Deflorian Giovanni, Cincelli Patrick, Löwe Gregor (20’ s.t. Trottner Luca), Debertol Cristoforo (15’ s.t. Rasom Sebastiano), Lorenz Daniele, Rasom Lorenzo (30’s.t. Lorenz Matteo), Cigolla Patrizio(35’s.t. Rasom Dennis), Deluca Daniele (28’ s.t. Riz Gabriele)
Con doi partides dantfora su la fin del campionat, l Fascia l’à arjont l zil de la promozion te la Pruma Categoria.
De gra a la venta per doi a un sul senester ciamp de Taio, contra l Predaia, i ladins à lascià vindò de 15 ponc la doi terzes en clasifica coscì, seence l Fascia aessa da perder l’ultima partida ai 26 de mé (domenia che vegn l Fascia paussa) e l’Ozolo e la Dolasiana fajessa 6 ponc te la doi partides che ge mencia, l vantac restassa maor che 7 ponc e chest, da regolament dèsc l met ence a la seconda en clasifica de jir en Pruma Categoria zenza cogner se jièr fora i play off.
N gran suzess donca per la sozietà de balon vidèda dal president Walter Ghetta che te un soul an, se à paà jù la delujion de l’an passà.
Contra l Predaia, aversarie ence te la finèla de Copa Provinzia, aessa bastà n pont demò, ampò mister Chelodi aea domanà ai jiadores de no fèr massa conc e de proèr a venjer. Coscì l’é stat, coi ladins che à proà sobito a tor te man l jech enceben che i nonejes no i é stac a vardèr e desche semper metea gran gaissa e ence vèlch colp proibì.
La pruma grana ocajion la é stata per i parons de cèsa aldò de na trata da cet olache demò n gran intervent del più joen te ciamp, Gregor Löwe, à salvà l’usc ladin. Pech dò l’é ruà però l vantac del Fascia. Bala recuperèda te mez al ciamp da Daniele Lorenz e trata lengia de Lorenzo Rasom per Toma che, profitan de la dormida de la defendura, co na bela trata soravia l portier à troà l gol del un a nia.
Resultat che dajea rejon al Fascia che da lo inant con n par de bela jièdes é jit ence vejin al secondo gol. Ampò, i prumes carantacinch se à serà sù zenza autres goi. Tel secondo temp i parons de cèsa é rué te ciamp amò più zaches e con vèlch jiador mudà che à dat maora calità. Aboncont la fasa de defendura ladina à tegnù fora belebon ence per merit del portier Colusso che te n par de ocajons se à fat troèr vertech con de bela parèdes.
A vint da la fin l’é ruà l secondo gol, semper de gra a Toma che, sciampà ai defensores de cèsa no à lascià redenzio al portier. Doi a nia e partida che someèa serèda sù. Someèa demò, ajache a diesc da la fin su na trata dal cianton Rizzardi a scurtà l desvantac dajan amò mingol de gaissa a sie compagnes. L final l’é stat roent coi nonejes duc inant e i ladins tedò a se defener e pronti a jir via en contratach. Proprie su n contratach Daniele Lorenz vegn petà jabas se vadagnan na trata dai undesc metres che aessa dalbon metù la parola fin a la endesfida, ampò Sebastiano Rasom fala la trata lascian amò trei menuc de fech a chi de cèsa che fosc i se aessa vadagnà ence ic na trata dai unesc metres che però l diretor de jech no à conzedù.
Al triple scìgol la legreza la é duta per i jiadores de Fascia e per na Sociazion che à volù dèr seghit, ence contra a vèlch polemica, al projet pontà via l’an passà col medemo grop tecnich, olache se metea dant l crescer dei joegn. Passà zenz’auter ence da la lègremes de la zeruchèda te la Seconda Categoria ma che à abù realisazion te la bela sajon de chest an.
Più avisa de la promozion e de la finèla de Copa, vegnarà scrit la setemèna che vegn.
En cont de la squadra mendres, suzesc per Arleves, 2a1 co l’Albian, Giovanissimi “A”, 11a0 col Verla e Esordienc, 3a2 contra l Fiem. Desfates per Juniors 5a2 contra l Verla e Giovanissimi “B” 4a1 contra l Comano Terme.
Sabeda ai 18 de mé, la Juniores jia sa Vich contra l’Audace da mesa les set e i Giovanissimi “A” semper a Vich da mesa les cinch se jia la venta del Campionat contra l Lavis. Domenia i Giovanissimi “B” jia contra l Trent da mesa les unesc a Vich. I Arleves paussa.