Fascia – Monte Ozolo 2 a 1 (goi de Cigolla Patrizio e Riz Gabriele)
Altopiano Paganella – Fascia 1 – 2 (goi de Cigolla Patrizio e Trottner Luca)
Formazion del Fascia: Colusso Alessandro, Trottner Luca, Giovanni Deflorian (35’ s.t. Cincelli Federico), Bernard Manuel, Toma Nicolas (20’ s.t. Rasom Dennis), Rasom Sebastiano, Lorenz Daniele (37’ s.t. Deflorian Giuseppe), Rasom Lorenzo (30’s.t. Cincelli Patrick), Lorenz Matteo (15’ s.t. Pezzei Michael), Gabriele Riz, Cigolla Patrizio.
L resultat l’é stat l medemo e coscì ence i ponc vadagné, ampò l’ultima doi endesfides del Fascia Balon à vedù te ciamp, na squadra dassen desvaliva. No te i jiadores che più o manco é restà i medemes ma te la prestazion.
Se te la partida contra l Monte Ozolo, enlouta terza en clasifica, l Fascia à moscià dut somà n bon jech e à vent con merit na endesfida emportanta soraldut per petèr fora dai jeghes per l secondo post, na formazion che enscin al lunesc de Pèsca aea perdù na outa soula te dut l campionat, te la partida jièda domenia passèda sul ciamp de Andalo, i bec de Mister Chelodi, à fosc jià la piora partida de la sajon risćian de no ruèr a venjer contra l’ultima de la clas.
Contra i nonejes del Monte Ozolo, Cigolla e compagnes é ponté via sobito delvers con gaissa e n jech asvelt che à portà al vantac de gra a na bela combinazion anter Riz e Cigolla con chest ultim che dò n scat dei bie tempes, se à troà soul dedant usc, lascian de giacia l portier ghest.
Sul un a nia l Fascia aessa podù troèr sobito l secondo gol ampò é mencià mingol de prezijion te la trates dei ladins, coscì, entorn al venteisem se à fat inant i nonejes che te diesc menuc é stac bogn dant de falèr na trata dai unesc metres, con Colusso che se à endò palesà n portier “para-rigori”, e dò de troèr l pareje co na bela trata da cet dai vint metres, co la bala che la se à ficià tel cianton aut.
Su l’un a un, dant de la fin del prum temp, i joegn de cèsa à tout endò l jech te man e co na gran jièda de Gabriele Riz, se à portà sul doi a un.
Resultat chest che l Fascia é stat bon de tegnir enscin al triple scìgol, con vèlch ocajion per fèr ite l terzo ma ence con n par de cruzies de massa soraldut su dotrei trates dal cianton.
Se contra l Monte Ozolo ge stajea ence padir mingol, contra l’Altopiano Paganella, l Fascia aessa cognù fèr valer la gran desferenza de calità anter la doi formazions, palesèda ence da la clasifica olache l’é trentasie ponc de desferenza.
Ampò coscì no l’é stat e a essere onesć enstouta l Fascia no aessa merità de venjer. Te n ciamp segur senester e burt per la pievia e la neif de inant marena e ence col vent a no didèr, Bernard e sozi à fadià jà dal prum, no metan ensema doi passajes e ruan semper tèrt dul balon. Enceben chest, dò n par de trates dei parons de cèsa fora de pech, a troèr l vantac l’é stat proprio i ladins, endò de gra a Cigolla, l soul fascian a se salvèr tel prum temp, che profitan de n cross de Lorenzo Rasom da man dreta, se à ficià anter portier e defensor petan te usc l’un a nia. L vantac aessa cognù dèr gaissa e pèsc al Fascia, enveze i joegn de cèsa se à petà inant falan ence ic na trata dai unesc metres e troan l’un a un aldò de na serie de fai te la fasa de defendura.
Dò na bela cridèda a la fin del prum temp, tei secondi carantacinch menuc se à vedù n Fascia mingol mior amancol dal pont de veduda de la gaissa, ma a jièr miec, o manco mèl, l’é stata amò i parons de cèsa che più de n’outa é rué apede usc fascian ampò zenza troèr la giusta trata. Coscì a n chèrt de ora da la fin su na trata da cet de Sebastiano Rasom, Patrick Cincelli à fat spona de cef per Luca Trottner che soul dedant usc no à falà.
Doi a un e duc a cèsa contenc, amancol per l resultat che, a la fin l’é chel che conta maormenter te chesta moment del campionat.
Fascia semper secondo a un pont ma col vantac su la terza slarià a doudesc ponc.
Chesta domenia, 5 de mé, sul ciamp de Vich da les cater, rua la Cauriol.
Per chel che vèrda la squadra mendres, anter paussa e sburlamenc per la neif, à jià demò i Giovanissimi co la squadra “A” che à vent 4 a 3 contra l Roncegno e la squadra “B” che à parejà 2 a 2 contra l Gardolo.
Chesta sabeda la Juniores jia col Fiemme da les sie a Vich, e i Arleves da mesa les nef da sera semper al Cotura contra l Redival. I Giovanissimi “A” jia enveze a Fornace da les cinch contra l Civezzano.
Domenia, da mesa les unesc a Caldonazzo, i Giovanissimi “B” jia contra l Levico.