Copa Provinzia: Trambileno – Fascia 2 a 1 (jièda jebia ai 28 de mèrz)
N resultat negatif chel de la pruma gara de semifinèla de Copa contra l Trambileno, ejit de vint menuc de jech, i prumes, jié malamenter dai ladins fosc per mingol de tenjion anter i tenc joegn te ciamp no proprio usé a jièr chesta partides. Scomenz de partida donca dassen senester coi ladins che ciapa sobito doi goi. Ampò dò chest burt scomenz, l Fascia se à librà da la tenjion jian 70 menuc dassen delvers e schician soraldut tel secondo temp i parons de cèsa. L gran sforz fascian à portà Matteo Lorenz a scurtèr l desvantac ma no l’é stat assà per arjonjer la parità. L resultat de doi a un lascià però amò averta la calificazion a la finèla. La partida de outa vegnarà jià a Vich jebia ai 14 de orìl.
Bolghera – Fascia 1 a 2 (goi de Daniele Deluca e Daniele Lorenz)
Formazion del Fascia: Colusso Alessandro, Cincelli Federico, Trottner Luca, Bernard Manuel, Debertol Cristoforo, Rasom Sebastiano, Lorenz Matteo (35’ s.t. Samuele Ruggiero), Cigolla Patrizio (30’s.t. Giovanni Deflorian), Rasom Lorenzo, Lorenz Daniele (25’ s.t. Toma Nicolas), Deluca Daniele.
Dò la desfata de la jebia, la pruma de la sajon, no l’era sorì per i bec de mister Chelodi se meter endò su la strèda giusta tant col cef che co la giames. Ampò contra la Bolghera, squadra mendra dal pont de veduda tecnich ma che la se sera tedò dassen delvers conzedan pech ai aversaries, l Fascia à palesà dal prum menut de voler demò na roba, venjer. L prum temp à vedù Debertol e compagnes semper en atach lascian ai parons de cèsa demò pec balogn da jier. Pec ma pericolousc, ajache te la soula doi outes che i se à fat inant, dant per n eror del portier ladin e dò per n stranteniment anter Trottner e Bernard, per pech no i troèa l vantac. Da l’autra al Fascia l’é mencià soraldut la prezijion te la trates e te l’ultim passaje. La gaissa però no la é mai mencèda e l’à didà soraldut tei secondi carantacinch menuc canche l Fascia l’é passà en desvantac per colpa de sie portier che, co la bala anter i piesc à volù descartèr l’atacant aversarie enveze de trèr demez l balon. Atacant che no se à fat gabolèr e n’outa robà la bala, l l’à pojeda te usc per l’un a nia.
N colp che aessa podù copèr duc ma no chest grop che no se à petà jù e alincontra, se à petà a cef bas amò più inant. A dèr l’utèda giusta ge à pissà soraldut Daniele Lorenz che per doi outes te cinch menuc, à fat valer sia gran forza fisica ge passan sora a duc i avesaries che ge se fajea dedant. La pruma outa petan la bala dedant usc olache Daniele Deluca se à fat troèr vertech per la spenjer ite e la seconda ge pissan enstesc co na bela trata da man cencia.
L vantac, merità, aessa podù esser slarià più che n’outa da Matteo Lorenz, Daniele Deluca e Lorenzo Rasom ma l’é mencià mingol de bona sort. Resultat finèl più che giust e soraldut trei ponc che dèsc seghit, tel campionat, a la endesfida co La Rovere che ence domenia passèda à vent.
Chesta domenia l Fascia jia endò sul ciamp amich da les cater contra i Solteri.
En cont de la squadra mendres, chisc i resultac del fin de setemèna passà: i Arleves à vent 1 a 0 contra l’Alta Valsugana de gra al gol de Emiliano Cinzol. I Giovanissimi “A” à vent 7 a 1 contra l’Altipiani Calcio (2 Massimo Lorenz, 2 Christian Tocco, 1 Michele Zulian, 1 Nicolò Dorich, 1 Thomas Bonelli), i Giovanissimi “B” à perdù 2 a 0, i Esordienc à vent 3 a 2.
Chesta sabeda la Juniores jia a Perjen da les cinch contra l’Oltrefersina, e i Giovanissimi “A” jia a Vich da mesa les sie contra l Valcembra. Domenia, i Arleves jia a Meano da mesa les unesc contra la Dolasiana e i Giovanissimi “B” da la medema ora a Vich contra l Lavis.