Fascia – Cornacci 2 a 0 (goi de Lorenzo Rasom e Patrizio Cigolla)
Formazion del Fascia: Colusso Alessandro, Cincelli Federico, Debertol Cristoforo, Deflorian Giovanni, Bernard Manuel, Rasom Sebastiano, Lorenz Matteo (15’ s.t. Ruggiero Samuele), Riz Gabriele (20’ s.t. Cigolla Patrizio), Pezzei Michael (25’ s.t. Rasom Lorenzo), Lorenz Daniele, Deluca Daniele (40’ s.t. Zanoni Lorenzo).
Ponta via endò la marcia del Fascia Balon che dò aer lascià doi ponc sul ciamp de Dimaro, aldò de l’autogol de Lorenzo Rasom, proprio de gra a na trata del medemo Lorenzo, metù te ciamp a vint menuc da la fin, à troà l gol del vantac e de fat de la venta. Na bela reventa per l joen da Vich ma soraldut trei ponc de gran emportanza per la squadra ladina che enceben palesan n jech mior de chel de la formazion da Tieser, à fadià mingol a troèr l gol, ruà desche dit demò a n chèrt de ora da la fin e dopià doi menuc dò de gra a Patrizio Cigolla, al terzo gol te cater partides, asvelt a devièr na trata de Samuele Ruggiero dassen bravo a corer dò a n balon che someèa oramai perdù e zenza enteres.
N resultat de doi a zero donca che enceben l’é ruà a la fin, l’é bensegur vadagnà e dèsc l met ai ladins de seghitèr la rengorsa al prum post.
Fascia che aessa podù jièr miec soraldut te la pruma pèrt de partida olache l’é mencià mingol de prezijion te la jièdes a scomenzèr da l’impostazion del jech de la defendura per ruèr enscin ai atacanc che no se à fat troèr vertesc te i ultimes metres dedant usc. La formazion de cèsa aessa de fat abù dotrei ocajions jà al scomenz per troèr l vantac ampò i corss de Bernard e la bela trates da cet e dal cianton de Sebastiano Rasom, no à mai troà i compagnes tel post giust.
De contra ence i fiemaces à abù n par de ocajions tel prum temp ma zenza dèr massa cruzies a Colusso.
I secondi carantacinch de jech à vedù Deluca e sozi trèr sù l livel de jech, schician te sie mezciamp i ghesć ma, desche jà dit se à cognù speter la mesora e i mudamenc de mister Chelodi a dèr mingol de gaissa al jech fascian per troèr goi e venta.
Chesta domenia, l Fascia jiarà a Trent contra la Bolghera da les sie da sera. Recordon ence che dantansera, jebia ai 28, i ladins à jià la pruma garejèda de semifinèla de Copa Provinzia sul ciamp de Mori contra l Trambileno. De chesta partida ve diron l’outa che vegn.
Per chel che vèrda la squadra mendres, à vent demò i Giovanissimi “A” de mister Giuliani, per 5a1 tel derby contra l Fiem (3 goi de Massimo Lorenz, 1 Christian Tocco, 1 Erik Costa)
Chest fin de setemèna, i Giovanissimi “A” e “B” jiarà sabeda da les cater e da les cinch a Folgaria e Trent contra Altipiani Calcio e Calisio. I Arleves jia domenia a Vich da mesa les unesc contra l’Alta Valsugana. La Juniores jiarà enveze mercol sera da mesa les unesc contra l’Ortigaralefre.