L’é stat n gran bel scomenz chel de la pruma squadra del Fascia Balon che ai 3 de mèrz à tacà la seconda pèrt de campionat e che à vedù i ladins venjer tant la pruma che la seconda endesfida. Enceben co la solita dificoltèdes del jièr al balon l’invern e coi jiadores conté aldò de malans e empegnes de lurier, i bec de mister Chelodi se à fat troèr vertesc jà dal prum menut de la partida più senestra, chela de contra a la pruma de la clas, La Rovere, che sun so ciamp a Roveré della Luna, aea semper vent. Emben, i joegn de Fascia aldò de na partida dassen zaca, é stac bogn de venjer per trei a nia de gra a na fasa de defendura zenza fai e ai goi de Patrizio Cigolla e del joen Samuele Ruggiero jit ite a la fin e asvelt à profitèr de doi erores del defensor Zadra per fèr ite doi goi. Te la seconda partida, jièda domenia passèda sul ciamp de Meano contra la Dolasiana, i ladins à palesà de aer na bona condizion fisica e soraldut de aer na gran convinzion te la propria forza. Seence l’aversarie l’aea vèlch pont demanco l livel de jech no l’era de segur mender respet a chel del La Rovere, alincontra l’era beleche mior. Ampò desche te la pruma endesfida, l trio Debertol – Deflorian – Trottner à portà dant na defendura zenza fai, ge conzedan na soula ocajion ai parons de cèsa te duc i nonanta menuc, olache l portier fascian se à fat troèr vertech. Se no se ciapa goi se é jà a mez del lurier e enstouta a troèr l vantac l’é stat Matteo Lorenz asvelt a trèr te usc na trata de cef de Lorenzo Rasom. L Fascia aessa abù l met de serèr sù l resultat più che n’outa ampò a Gabriele Riz ge é mencià mingol de prezijion dedant l portier. Chest à fat scì che te l’ultim chèrt de ora aldò ence del cartelin ros ciapà da Ruggiero, l Fascia padissa mingol la prescion di aversaries zenza però risćèr. Al triple scìgol del diretor de jech i ladins à coscì podù festejèr la venta e ence autres doi ponc vadagné su la pruma en clasifica fermèda sul doi a doi da la Cauriol. Ades l prum post l’é a n soul pont e jà chesta domenia sul ciamp de Dimaro contra la Solandra l Fascia proarà a l’arjonjer. L fin de setemèna passà à scomenzà ence la squadra mendres. La Juniores à perdù 3a1 contra l Telve (gol de Anwar Defrancesco), i Arleves à parejà 2a2 contra la Vigolana (goi de Milovan Anackov e Mattia Lastei), i Giovanissimi A à perdù 2a1 contra l’Alta Valsugana (gol de Simone Rasom), i Giovanissimi B à vent 1a0 (gol de Erion Martuzei).
DOLASIANA – FASSA 10 marzo 2019
