Jebia ai 25 de otobre, partida de Copa Provinzia, Monte Vaccino – Fascia 1 a 5 (goi de Rasom Lorenzo, Lorenz Daniele, Rasom Sebastiano e doi de Delforian Giuseppe)
Monte Ozolo – Fascia 0 a 0
Formazion del Fascia: Colusso Alessandro, Trottner Luca, Deflorian Giovanni, Bernard Manuel, Debertol Cristoforo, Rasom Sebastiano (15’ s.t. Riz Gianni), Lorenz Matteo, Pezzei Michael, Rasom Lorenzo (25’ s.t. Toma Nicolas), Deluca Daniele, Lorenz Daniele (15’ s.t. Cigolla Patrizio).
Podea esser na setemèna perfeta chela che en domenia passèda se à serà sù co la endesfida contra l Monte Ozolo, te l’auta Val de Non. Ampò, sul senester ciamp de Cloz, fat pesoch da la pievia, l Fascia no é stat bon de troèr l gol che fossa stat dassen vadagnà, e che aessa dat la terza venta te set dis.
Ai bec fascegn ge era stat domanà de dèr seghit a la venta contra l Giovo, tant per la clasifica che per l moral. E i ladins aea sobito responet delvers te la partida de Copa jièda en jebia a Martignano contra l Monte Vaccino. Per passèr servia venjer con amancol doi goi de desferenza e, enceben sot de un a nia a la fin del prum temp, tei secondi carantacinch de jech Debertol e compagnes à schicià i aversaries desche mai fat dant, troan te i prumes ot menuc cater goi e de fat ence la calificazion. A serèr sù dant de la fin de la partida l’é ruà ence l quinto gol. L Fascia se à coscì vadagnà l met de se jièr tel meis de mèrz la doi partides de semifinèla contra la Trambileno.
Mingol stencé ma con gran gaissa, i joegn de mister Chelodi à portà ence te Val de Non n bel spirit de squadra e na gran voa venjer. Enceben che l ciamp no semper l lo conzedea, l Fascia à proà a jier la bala se pojan soraldut su Deluca, metan ensema de bela jièdes e dajan più de vèlch cruzie ai defensores de cèsa. La miora ocajion del prum temp la é ruèda sui piesc de Daniele Lorenz che ampò soul contra l portier no à troà l giust colp su la bala. Da l’autra man i nonejes no à mai trat l balon envers l’usc fascian. Conscidrà ence la partida jièda trei dis dant, se podea pissèr che tel secondo temp i parons de cèsa aessa podù aer la soramessa sui ghesć ma coscì no la é stata. Alincontra, l Fascia à metù te ciamp duta la energies, jian dassen miec del prum temp e metan ensema una dò l’autra na lingia de ocajions che a ge pissèr, amò ades, no somea possibol che la bala no la sie rodolèda te usc. Debertol e Deluca à proà più de n’outa con trates da dalenc, Cigolla e Rasom L. con trates da vejin, Deflorian e Bernard su trates dal cianton, ampò, vèlch outa dalbon per zentimetres e autres per gran parèdes del portier no l’é stat nia da fèr. E desche sozede despes, canche se fala scì tante ocajions l risćio l’é de ciapèr l gol te la soula ocajion che s à de contra. E beleche beleche la jia coscì ence enstouta, belebon che per n’outa ence l’atacant aversarie no à troà l’usc, perché fossa stat dassen na punizion massa grana.
Enceben che no l’é ruà la terza venta, enstouta ai ladins no se pel ge dir nia ajache i à petà te ciamp dassen dut chel che i aea e ence de più. Etres doi ponc lascé per strèda ma segur vadagné te la convinzion de esser su la bona strèda.
Domenia che vegn, l Fascia jià a Vich da mesa les trei contra l’Altopiano Paganella.
L mior: Daniele Deluca
Chel che aessa podù fèr miec: Daniele Lorenz (demò per l gol falà)
Tel fin de setemèna passà, i Arlevesà vent 2a0 col Gardolo (goi de Emiliano Cinzol e Samuele Ruggiero), i Giovanissimi ”A” à vent 4a1 contra l Roncegno (goi de Erik Costa, Sebastiano Cassan e doi de Massimo Lorenz), i Esordienc à vent 3a1 contra l Fiem.
Doman, sabeda ai 3 de november, Juniores e Arleves jia da les cinch a Cavaleis e Celledizzo contra Fiem e Redival, i Giovanissimi “A” jia a Vich da mesa les sie contra l Civezzano. Domenia da doman a Vich da mesa les unesc jia i Giovanissimi “B” contra l Gardolo.