Fascia – Giovo 1 a 0 (gol de Trottner)
Formazion del Fascia: Colusso Alessandro, Trottner Luca, Debertol Cristoforo, Deflorian Giovanni, Riz Gianni (23’ s.t. Toma Nicolas), Bernard Manuel (28’ s.t. Rasom Lorenzo), Lorenz Matteo, Rasom Sebastiano, Pezzei Michael (40’ s.t. Cincelli Federico), Cigolla Patrizio (20’ s.t. Deflorian Giuseppe), Deluca Daniele.
Se dijea che l vent aessa cognù mudèr per dèr na drezèda a la sajon del Fascia. De segur podon dir che en domenia passèda sul ciamp Cotura de Vich, l vent sofièa dalbon e l Fascia à venciù.
Se l’é mudà deldut o no, se l vedarà te chest ultim meis de jech.
Na venta chela contra l Giovo vadagnèda soraldut aldò del jech desmostrà tel secondo temp, olache i ladins à schicià i aversaries e abù trei cater bona ocajions aldò de la trates de Matteo Lorenz, Gianni Riz e Lorenzo Rasom, fora de pech o ben blochèdes dal portier. Tel prum temp de contra, enceben che sul pian del jech l Fascia no à beleche mai sopì i ghesć, i cembrans à abù la più grana ocajion co na trata da cet che la se à blocà sul remenat. Zacan mingol de bona sort vegnissa da dir.
L gol del vantac fascian l’é ruà a la metà del secondo temp de grà a Luca Trottner, che su na trata dal cianton de Sebastiano Rasom, l se à librà del defensor e dedant usc no à falà.
L’é na venta chesta dassen emportanta per la clasifica, che ampò no descancela i problemes de la formazion de mister Chelodi che, ence te chesta partida, desche te chela passedes, à fadià dalbon massa per trèr l balon vindò la schena del portier aversarie. Anter campionat e copa, l Fascia à jià unesc partides fajan catordesc goi, sie de chisc, trei per om, é stac fac dai defensores Trottner e Debertol e doi da Gianni Riz. I etres sie i é stac fac da sie jiadores desferenc. Chisc dac, dèsc a entener de coche te chest moment, desche per auter l’an passà, ai ladins l’é mencià l “bomber”, l’atacant che fèsc ite na dejina de goi. Per proèr a jir endò sù de categoria, serf dassen troèr en prescia chest tipo de jiador. Che no vel dir jir a tor zachei da fora ma dèr l met a chi che l’é jà de poder troèr l vers giust per esser dezisif dedant usc.
L mior: Luca Trottner
Chel che aessa podù fèr miec: Patrizio Cigolla
Chesta domenia il Fascia cogn proèr a dèr seghit a la ventes, contra l Monte Ozolo, sul ciamp de Cloz da mesa les trei. La setemèna che vegn, daron cont ence de la endesfida de Copa che l Fascia à jià jebia ai 25 a Martignano contra l Monte Vaccino.
La squadres di joegn à portà a cesa resultac desvalives: la Juniores à perdù 2a0 contra l’Albian, i Arleves a parejà 2a2 contra la Ravinense (goi de Samuele Ruggiero e Enrico Bernard), i Giovanissimi “A” à vent 4a2 contra la Vigolana (3 goi de Massimo Lorenz e 1 de Sebastian Cassan), i Giovanissimi “B” à perdù 5a0 contra l’Anaune, i Esordienc à vent 3a1 contra l Civezzano e i Ponjins “B” à vent 3a0 contra l Fiem.
Doman, sabeda ai 27, i Giovanissimi “A” jia a Roncegno da les cater, la Juniores paussa.
Domenia, i Giovanissimi “B” jia a Ischia de Perjen da mesa les unesc contra l’Alta Valsugana e i Arleves jia a Vich da la medema ora contra l Gardol.