Fascia – Bolghera 0 a 1
Formazion del Fascia: Colusso Alessandro, Trottner Luca, Cincelli Federico (15’ s.t. Debertol Cristoforo), Deflorian Giovanni, Rasom Lorenzo (20’ s.t. Riz Gianni), Bernard Manuel, Lorenz Matteo, Rasom Sebastiano (35’ s.t. Cincelli Patrick), Riz Gabriele (8’ p.t. Toma Nicolas), Pezzei Michael (30’ s.t. Lorenz Daniele), Deluca Daniele.
Perder partides desche chesta, l’é dassen da no creer. Contra n aversarie tant schiet da no esser bon de meter ensema cater passajes un dò l’auter, ciapèr n gol l’era jà na desfata ma ruèr al nonanteisem menut zenza esser bogn de n fèr ite, dalbon l’é n dejaster.
E pissèr che dò nience n menut Gabriele Riz aessa abù l met de portèr sobito i ladins en vantac ge dajan a la partida n’autra direzion ma, soul contra l portier ghest, l se à fat ciapèr da la prescia trajan l balon fora de usc. Béleche na malediscïọn per l joen da Ciampedel che trei menuc più tèrt l se à destirà na chessa è à cognù lascèr l ciamp.
Fora Riz, ite Toma ma la musega no é mudèda, col Fascia che à seghità a spenjer enceben che la squadra de cèsa no jièa nia delvers, falan n muie de passajes tant dedant che dedò.
Pech dò la mesora l moment che à dezidù la endesfida. Trentins che vegn inant zenza gran convinzion, Pezzei che recupera l balon e l lo passa endò al portier fascian che, seence no l’aea prescion à pissà de trèr dalenc l balon falan ampò la trata, ge passan coscì la bala al soul atacant ghest tedant l’area che maraveà dal don ciapà no se à fat preèr e l lo à descartà. Un a nia.
Sessaben che dò aer fat l gol, che mai i cherdea de ruèr a fèr, i jiadores del Bolghera i se à schicià vindò proan a serèr vigni spazie. I prumes carantacinch de jech i se à serà sù con n par de bela trates de Lorenzo Rasom e Matteo Lorenz ampò zenza bon ejit.
Dò n bicer de tè ciaut i joegn de cèsa é ponté via tel secondo temp con chela de dèr na gran outa a la partida ma, dò diesc menuc, la miora ocajion i l’à abuda i trentins. Trata da dalenc de n defensor e balon che rua sorì te brac del portier de cèsa. Someèa n nia de fat ampò l diretor de jech, se à pissà de conzeder na trata dai unesc metres per n contat anter Cincelli e n atacant, con chest ultim che en realtà l’era sluzià ados l fascian. A comedèr l’eror del diretor de jech ge à pissà Colusso paran la trata, se rediman coscì en pèrt ence per l fal del prum temp.
Chest episodie dessema a dotrei mudamenc de jiadores e de schem de jech someèa poder dèr l’utèda giusta a la endesfida. L Fascia à scomenzà a jièr delvers e a atachèr zenza rechia metan ensema sacotanta ocajions, ma la trates de Debertol, Bernard e Lorenz Daniele le se à blocà sui remenac.
La parità vossa stata auter che vadagnèda e a la dir duta ence la venta ma l jech l’é chest e vèlch outa l’é crudeil. L’é segur da dir però che la maora colpes les é dei joegn de Fascia, ajache no ruèr a fèr ite gol a formazion mendres desche chesta, dalbon no la va.
L mior: Michael Pezzei
Chel che aessa podù fèr miec: Alessandro Colusso
Chesta partida à serà sù n fin de setemèna dassen rie per la sozietà de balon fascèna olache ence Juniores e Arleves à perdù 7 a 0. Belebon che i Giovanissimi de mister Giuliani à portà mingol de seren co na bela venta 7 a 0, (3 goi Simone Rasom, 2 Christian Tocco, 1 Michele Zulian, 1 Massimo Lorenz) e chi de mister Pochiesa n bon pareje 1 a 1.
Chest fin de setemèna la pruma squadra jia domenia a Trent da mesa les cater contra l Solteri, la Juniores sabeda a Vich da les sie contra l’Oltrefersina, i Arleves semper a Vich domenia da mesa les unesc contra la Dolasiana. I Giovanissimi “A” sabeda da les cinch a Albian contra l Valcembra e i Giovanissimi “B” domenia da mesa les unesc a Lavis.