Cornacci – Fascia 0 a 3 (goi de Luca Trottner, Daniele Deluca, Matteo Lorenz)
Formazion del Fascia: Colusso Alessandro, Trottner Luca, Cincelli Federico, Debertol Cristoforo, Rasom Lorenzo (25’ s.t. Deflorian Giuseppe), Riz Gianni (15’ s.t. Bernard Manuel), Lorenz Matteo, Riz Gabriele (20’ s.t. Daniele Deluca), Pezzei Michael (35’ s.t. Lorenz Daniele), Cigolla Patrizio (30’ s.t. Toma Nicolas).
Se cognea dèr seghit a la pruma venta en campionat e coscì la é jita. Dò i trei goi fac ite a la Solandra, i ladins à batù col medemo resultat ence i aversaries fiemaces de la Cornacci.
La endesfida la se prejentèa con n par de perìcoi per Debertol e compagnes, dant de dut perché la squadres de Fiem les dèsc semper zeche de più contra l Fascia, dapò perché l ciamp de Tieser l’é belebon più picol de chel de Vich e chest deida la squadres a se defener miec.
E se anter la doi formazions se aessa cognù dir chela che aessa abù da se defener maormenter te i nonanta menuc, chesta no l’era l Fascia. Amancol a rejonèr dantfora.
L prum chèrt de ora ampò somèa sbujarèr chest pensier, coi parons de cèsa ponté via a mile, no lascian fèr l jech che i volea ai fascègn. Aboncont chesta gran gaissa à portà pech a chi da Tieser ajache la defendura à semper controlà delvers i atacanc aversaries. L soul perìcol l’é ruà da na trata da cet del veie compagn de squadra Guido Dellafior che, devià da la schena Matteo Lorenz, aea ciapà na traietoria mingol certa, olache però se à fat troèr vertech Colusso.
La spenta de la Cornacci la se à fermà chiò e da chiò inant l’é stat beleche demò Fascia ence perché al venteisem menut Luca Trottner à portà en vantac i bec de mister Chelodi co na bela trata de cef aldò de na trata dal cianton de Sebastiano Rasom. L’un a nià à dat forza ai ladins che per duta la partida no à conzedù nia ai aversaries e à schicià i parons de cèsa te sie mezciamp per troèr l secondo gol, ruà ampò demò a diesc menuc da la fin canche Federico Cincelli co na trata lengia da la defendura, à troà Daniele Deluca. Chest ultim, te n soul colp à metù jù bala e sutà l’ultim defensor. Dapò, vis a vis col portier, no à falà. L doi a nia à de fat serù sù la partida ence se l’é stat amò l temp per ciapèr l remenat aut con Toma e fèr ite l terzo gol, de gra a Matteo Lorenz che à trefà l cianton aut a la cencia del portier co na gran trata da fora de l’area.
Trei ponc porté a cèsa con merit che dèsc la convinzion de poder fèr amò miec te la edesfides che vegn.
Chesta domenia l Fascia jia a Vich da mesa les cater contra la Bolghera e jebia ai 11 da mesa les nef da sera contra l’Oltrefersina te la Copa Provinzia.
L mior: Matteo Lorenz
Chel che aessa podù fèr miec: Gianni Riz
De bogn resultac é rué ence da la squadra mendres: la Juniores à vent 3a2 contra l Cembra ’85 (goi de Anwar Defrancesco, Mirko Barcatta e Nicolas Toma), i Arleves à parejà 1a1 contra l’Ortigaralefre (gol de Samuele Ruggiero), i Giovanissimi “A” à vent 7a2 contra Fiem (doi goi per om de Massimo Lorenz e Erik Costa, un gol de Mattia Roldo, Michele Zulian e Jacopo Sommavilla), i Giovanissimi “B” à perdù 7a0 contra l’Arco, i Esordienc à vent 3a0 contra la Monti Pallidi, i Ponjins “B” à vent contra l Fiem e i Ponjins “C” à vent 2a1 contra la Dolomitica.
Chesta la partides de chest fin de setemèna:
Sabeda ai 6, la Juniores jia a Villa Agedo da les cinch contra l’Ortigaralefre e i Giovanissimi “A” a Vich da mesa les sie contra la Paganella.
Domenia ai 7, i Arleves contra l’Auta Valsugana da mesa les unesc a Madrano, i Giovanissimi “B” a Vich da la medema ora contra l Calisio.