Borgo – Fascia 5 – 1
Formazion del Fascia: Lorenz Manuel, Cincelli Patrick (30’ s.t. Demarinis Giuseppe), Trottner Luca, Deflorian Giovanni, Riz Gianni, Debertol Cristoforo, Rasom Sebastiano, Bernard Manuel (40’ s.t. Rasom Pierpaolo), Pezzei Michael, Lorenz Matteo (20’ s.t. Cigolla Patrizio), Riz Gabriele
Desche l’era stat scrit acà na setemèna, l Fascia per portèr via ponc dal ciamp de Borgo, aessa cognù fèr n cunst se no adertura n miràcol, ma se sà che n muie de outes la realtà la te porta coi piesc jabas e coscì la é stata ence enstouta.
Ampò l resultat finèl de cinch a un no dèsc merit a dut l bon fat da la formazion ladina che enscin al setanteisem menut aea tegnù i prumes de la clas sul resultat de un a un jian dassen na bona partida.
Sessaben che jà dal prum menut l jech l’é stat vidà dai valsuganoc, formazion massa forta per chesta categoria, che dò cinch menuc i aea jà troà l vantac de gra a n par de erores de la defendura fascèna. Podea someèr l scomenz de na desfata enveze Debertol e compagnes i se à serà e defenù con orden proan a pontèr via en contratach con gaissa chèla pecia outes che i parons de cèsa i lo conzedea. L’é coscì che a la mesora l’é ruà ence l gol de la parità de gra a na bela azion. Bala robèda te mez ciam, slarièda su la dreta per Bernard che l l’à passèda tedò a Rasom che de pruma à trat tei seidesc metres n bel cross per Lorenz che de cef no à lascià redenzio al portier. L resultat fosc ence no deldut spetà à dat forza ai joegn de Fascia che à tegnù bot fin a la paussa e a ence scomenzà n muie delvers l secondo temp, zenza mai risćèr massa e aàn enscinamai l’ocajion per jir en vantac con Riz Gabriele che ampò à calcolà mèl la traietoria del balon no ruan a la ciapèr delvers soul dedant a l’usc.
Pecià perché n’atim più tèrt la partida la se à outà deldut da la man del Borgo che te doi menuc à vadagnà doi trates dai unesc metres se portan sul trei a un e de fat seran sù la endesfida. Anter l’auter su la pruma trata conzeduda dal diretor de jech l’é dalbon n muion de dubies.
Dò aer jià e scombatù dut chel che la jia, a n chèrt de ora da la fin e sot de doi goi, l Fascia se à n’ atim perdù via, lascian vèlch busc de massa per i forc atacanc del Borgo che mai contenc à troà la ocajions per fèr ite ence l quarto e quinto gol.
Al triple scìgol, enceben che l resultat sie stat pesoch, ai joegn ladins resta la segurezza de aer fat na bona partida e che jian con chest spirit no se pel che fèr delvers te la ultima trei partides che resta da jièr.
Chesta domenia da les cater, i bec de mister Chelodi i se la vedrà sul ciamp de Vich contra l Piné.
Per chel che vèrda la squadra mendres, la Juniores à perdù per doi a nia contra l’Audace, i Arleves à pussà, i Giovanissimi à vent 7 a 1 contra contra la Solandra (5 goi de Massimo Lorenz, un per om de Michele Zulian e Emiliano Cinzol), i Esordienc “A” à parejà 3 a 3.
Chesta sabeda, la Juniores jia a Gardolo da les sie contra l Solteri e i Arleves jia a Vich da les cinch contra l Valcembra. I Giovanissimi paussa.