Piné – Fascia 5 – 0
Formazion del Fascia: Lorenz Manuel, Bernard Manuel, Cincelli Federico (1’ s.t.Cincelli Patrick), Deflorian Giovanni, Riz Gianni (20’ s.t. Lorenz Matteo), Cigolla Patrizio (15’ s.t. Zanoner Dimitri), Pezzei Michael, Rasom Sebastiano (30’ s.t. Toma Nicolas), Kola Pietro (1’s.t. Debertol Cristoforo), Deluca Daniele, Riz Gabriele.
Vedù l resultat de 5 a 0 per l Piné, se podessa serèr sù l’articol con na scempia frasa: la più burta partida del Fascia da n gran pez en cà.
No l’é stat ne l vent e nience l soreie de contra, ne l teren da na man giacià e nience l’erba auta che se cogn dir, de n vers o de l’auter à dassen complicà dut l jech, ampò chel che à portà a na desfata tant grana, l’é stat l fèr de duc i jiadores fascegn te ciamp jà a partir dal prum menut.
Pecia conzentrazion e amò manco gaissa. Chisc l’é i fatores che à portà i jiadores del Fascia a falèr più e più outes passajes, intervenc e dezijions, e a ge regalèr, perché se à tratà proprie de gregn regai, i goi ai parons de cèsa. Se no fossa stat per vèlch trata da cet tel secondo temp, i ladins no i fossa mai rué a fèr na trata te usc aldò de na azion.
L prum temp se aea serà sù col resultat de un a nia aldò del gol ruà dò n chèrt de ora dal scomenz. Trata lengia da tedò, linea de defendura fascèna che no la se mef, portier che proa a vegnir fora a la desperèda e atacant pinaiter che rua per prum su la bala e l la trèsc sora Lorenz zenza però che chesta la rue dreta te usc. A la petèr ite, chierian de la trèr dalenc l’é stat l defensor fascian Deflorian.
Sot de n gol se podessa ampò amò drezèr la endesfida ma tel secondo temp enveze de ge dèr na outa a la direzion touta tei prumes carantacinch menuc, Debertol e compagnes i fona deldut te n gran scur.
Passa pech dal scomenz e endò na strantenuda anter Lorenz e Deflorian che i se bloca un co l’auter, dèsc l met a Fontana de robèr bala e trèr ite l doi a nia. Chest eror à portà l moral dei ladins sot i piesc e a no jièr più col cef se trajan inant zenza fondament, lascian gregn bujes tedò e seghitan ence a perder balons e contrasć. L terzo gol l’é ruà su n contratach aldò de na trata co la mans per l Fascia en fasa de atach, deldut falèda e trata ados a n jiador de cèsa. L quarto, dintorn la mesora, à troà endò la defendura fascèna ceta a chiamèr n forajech che no l’era e desche se no bastasse, a serèr sù la partida l’é ruà ence l quinto con na trata da fora zenza gran pertenzion ma che Lorenz se à lascià sciampèr da la mans.
Na partida tant burta da no poder esser vera e che la cogn esser archivièda sobito desche na “giornèda no” ence perché chesta domenia, rua sul ciamp de Vich per l’ultima partida de l’an sul ciamp amich, la Dolomitica, te n’autra partida dassen emportanta.
Resultat negatif ence per la Juniores che à perdù 5 a 1 contra l Borgo. La doi squadres di Esordienc à enveze pareja 2 a 2 contra Vipo Trento e Verla.
Chest fin de setemena, apede la partida de la pruma squadra domenia da mesa les trei, Juniores e Arleves antizipea al vender sia partides. La Juniores contra l’Ortigaralefre a Vich da mesa les set, i Arleves a Vigolo Vattaro contra la Vigolana da mesa les ot.