Fascia – Fiemme 0 – 1
Cincelli, Bernard, Trottner, Deflorian Gio., Dellafior, Debertol, Porcu (40’ s.t. Deflorian Gia.), Pezzei (35’ s.t. Dorich), Cigolla (30’ s.t. Dallio), Toma, Kola.
L Fascia tegn cef a la pruma de la clas, l Fiem, ampò a la fin dei nonanta menuc a fèr festa le la formazion da Cavaleis che co na trata dai unesc metres a chinesc menuc da la fin troa l gol del vantac e de la venta che ge conzet de restèr al prum post. Per i ladins enveze n gran despiajer ence perché dò na burta desfata en lunesc de Pèsca ja Pardac de contra a la Dolomitica, olache i aea jià dassen mèl, enstouta i joegn de cèsa à jià con gaissa e combatù dal prum a l’ultim menut, fajan fadìa a momenc, ma se defenan semper con orden e soraldut al scomenz del secondo temp metan ence sot i ghesć.
Soraldut te la pruma frazion de la partida, l jech l’é stat beleche semper vidà dai fiamaces che ampò à metù demò n par de oute en pericol l’usc fascian, n’outa con Defrancesco e n’outa con Bolgiani. L Fascia à proà vèlch sortida d’atach troan dotrei combinazions su la fasces zenza però dèr massa cruzies al portier fiamac.
Fora dai deregoladoes, i parons de cèsa fèsc veder che segur no i é sun ciamp a fèr la vitima sacrifichèla del Fiem e desfrutan i erores dei aversaries ciapa te man l jech per amancol vint menuc troan una dò l’autra dotrei bona ocajions con Debertol e Kola. Purampò la trates les fenesc fora de pech o chietes te la mans de Delladio. A la metà dei secondi carantacinch de jech vèlch mudament te la formazions porta endò la partida te la mans de Varesco e compagnes che co la forza de la desperazion per la poura de se veder sluzièr fora de man l campionat, troa vèlch ressorsa en più e aldò de na combinazion su la man cencia, Valle ruà dedant usc fascian, vegn tirà jabas da Deflorian te l’ultim tentatif de l blochèr. L diretor de jech no à dubies e conzet la trata dai unesc metres che Varesco no fala. Sot de un gol i ladins no mola e proa enscin al triple scìgol a drezèr l’èjit de la endesfida ge ruan apede co la trates de cef de Trottner e Kola ampò fora de pech.
I trei ponc va a Cavaleis, la delujion la é duta fascèna. Se cogn dir però che perder coscì amancol no lascia recor ajache dassen enstouta i bec del President Ghetta à dat dut.
Ades no resta auter che tachèr endò a fèr ponc, scomenzan sobito de contra al Borgo, semper sul ciamp de Vich, sabeda ai 29 de oril da mesa les set.
Da la squadra mendres rua resultac desvalives. I Arleves sepolesc zenza pietà l Cristo Re per 18 a 0, i Giovanissimi pert 8 a 3, i Esordienc “A” pert col Piné 3 a 0 e i Esordienc “B” pareja per 2 a 2 contra l Lavis.
Chest fin de setemèna, i Arleves jia a Meano domenia da mesa les unesc contra la Dolasiana, i Giovanissimi sa Vich sabeda da les ot contra l’Oltrefersina, i Esordienc “A” sabeda a Segonzano da les cater contra l Valcembra, i Esordienc “B” sa Vich domenia da mesa les unesc contra l Bolghera.